Kum u myntri rangbah ka jylla Meghalaya, u Conrad K. Sangma mynta ka sngi u la leit ban shim bynta ha kaba rakhe ia ka sngi kyrpang ki nonghikai ba la tip kum ka ‘63rd National Teacher’s Day’ ha Nongbah Shillong, kaba dei ka sngi kyrpang ban ai burom halor u synniang u bynhei ba ki nonghikai ki la saindur bad tei ia la ka ri bad ka jaid bynriew.
Haba leit ban shim bynta kum u kongsan ha kane ka sngi rakhe ia ka sngi kyrpang ki nonghikai ha Nongbah Shillong, u Conrad K. Sangma kum u myntri rangbah ka jylla, u la shim ruh ia ka bynta ba kongsan ban sai ia ki khusnam ba kynthup naduh ka State Award, District Award bad ka Special Award, ba la ai burom sha kito ki nonghikai kiba ioh pdiang ia kitei ki khusnam halor ki jingtrei ba kordor ba ki la kyntiew ia ka jingnang jingstad kum kita ki nonghkai hapoh ka jylla bad ka ri.
Haba kren ruh ha kane ka sngi, u myntri rangbah ka jylla u Conrad K. Sangma u la ong ba u dap shisha da ka mynsiem jong ka jingsarong na ka bynta ki nonghikai kiba la trei shitrhem ban ai ia ka jingnang jingstad bad ruh ki jingiaishah ba ki la len lade ban kyntiew ia ka imlang ka sahlang kum kita ki nonghikai.
U la ai khublei kyrpang ruh ia ki nonghikai ba ki la shakri ia ka kam naduh ka dohnud ban ai jingnang jingstad ia ki khynnah bad ki samla pule bad khatam ba ki la pynrung ia kata ka dor jong ka jingstad na ka bynta ki samla ba kin shim ia kata ka jingkitkhlieh na ka bynta ban tei ia ka lawei ba phyrnai jong ka jylla bad ka ri.
Shuh shuh, ha kane ka sngi u la pynpaw ruh ia ka mynsiem jong ka jingkmen khamtam ba u la ioh lad ban pynkhamti ia ki khusnam kata naduh kata ka khusnam State Award, District Award bad ka Special Award ba la pynkhamti ia ki Nonghikai kiba la ioh pdiang ia kitei ki khusnam, kaba long ka jingai mynsiem ia ki nonghikai ba kin dang shim shuh ia ka jingkitkhlieh ban ai ia ka jingshakri kaba bha tan ban kyntiew ia ka ri bad ka jaid bynriew lyngba ka jingnang jingstad kaba ki la ai bad saindur ia ki khynnah bad ki samla pule ha ka jylla bad ka ri hi baroh kawei, u la bynrap.
