Ka North-Eastern Regional Agricultural Marketing Corporation (NERAMAC) mynta ka sngi ka pynkut noh ia ka prokram ba ar sngi lynter ia kaba la ai kyrteng ‘Promotion of Millets Production in Meghalaya’ lane ka jingkyntiew ha ka kam rep ia u Krai ha ka jylla Meghalaya. Kane ka prokram kadei hapoh ka jingkhmih jong ka Ministry of Development of North Eastern Region (DoNER) ka sorkar India.
Ia kane ka prokram kaba la pynlong ha Meghalaya Rongali Bihu Auditorium, Shillong la wan ban iadon bynta da u BK Sohliya, Adviser cum Chairman jong ka Meghalaya Farmers Empowerment Commission, u Commodore Rajiv Ashok (Retd), Managing Director, NERAMAC, u M Iboyaima Meitei, Horticulture Adviser, North Eastern Council (NEC), u Kayio Kayina, MD NERCORMS, ka Kong JC Lyngdoh, Director jong ka tnad Agriculture ka sorkar Meghalaya lem bad kiwei kiwei.
U Bah BK Sohliya haba kren ha kane ka sngi u la ban jur halor ka jingdonkam ban pynlong ia ka jingpynsngewthuh paidbah halor ka jingdonkam ban thung bad pynmih ia u Krai lane uba la tip kum u Millet ha ka ktien phareng. U la kyntu ruh ia ki nongrep kiba la wan ha kane ka sngi, ba kin shimkhia ban thung ia u Krai uba la u la ong ba u dei kum uta u jingbam uba kongsan bad tei bha bad ban pyniaid iew ha kata ka rukom ba ki nongrep ruh kin ioh ia ka jingmyntoi kaba bun shah. U Bah Sohliya u la ai ruh ka jingiaroh ia ki sienjam kiba la shim da ka NERAMAC bad kyntu ba kin don ia ka jingiatreilang bad kiwei kiwei de ki tnad ban pynlong ia kane ka kam kaba jop.
Na ka liang u Commodore Rajiv Ashok (Retd) ha ka jingkren ka jong u, u la pynpaw ia ka shibun ki jingmyntoi halor ka jingbam ia u Krai ban long kum ka kawei ka bynta ban bujli ia u khaw, bad pyntip ruh halor ki sienjam kiba la shim da ka sorkar kmie halor ka jingthmu ban kyntiew ia ka kam rep ba iadei bad u Krai kat haduh ba la lah ban pynpaw sha ka pyrthei bad pynlong ruh iaka International Year of Millets.
U M Iboyaima Meitei, u la pynpaw ia ka jingiaroh halor ki bynta kiba ka NERAMAC ka la shim ban kyntiew ia ka jingthung bad pynmih ia u Krai. U la ong ruh naduh ba la pyntreikam ia ka FPO Central Scheme da ka NERAMAC, la leh ha kata ka rukom kaba hap ban ai ia ka jingiaroh da kaba bynrap ruh ba ka NEC ka kyrshan pura ia ka NERAMAC halor kane ka bynta.
Katba na ka liang jong ka Kong JC Lyngdoh ka la iathuh ba ka jingthung ia u Krai ha ka jylla ka la nang kiew katnang mih ki nsem bad ba na ka liang ka sorkar jylla, ka la ialeh kumno ban kyntiew ia kane ka bynta ka lyngba kata ka Mission Mode ban pynthikna ba kan iaineh haduh ka lashai la shisngi.
