Da ki spah tylli ki dukan bad iing kiba la tei beain ha jaka ka PWD kiba don ha ka liang Assam, kata naduh Jorabat ter ter shaduh Byrnihat, ki la shah kyndang noh ha ki bor sorkar ka Assam.
Katei ka jingkyndang naphang ia ki dukan bad iing kiba la shna beain ha ki jaka sorkar, ka la sdang hynnin ka sngi, ha kaba ki bor sorkar ka Assam, ha ka jingdon ki Magistrate, ki heh Pulit bad ki CRPF, ki la rah da ka kor Puh Shilum, na bynta ban kyndang naphang ia ki dukan bad ki iing.
U Ringku Deka na ka shnong 13mer sha ka liang Assam, u la iaroh ia ka sorkar Assam, kaba la nud ban shim ia katei ka sienjam ban kyndang naphang ia kitei ki dukan bad ki iing, kiba la shu tei beain ha shilynter ka surok na Jorabat shaduh Byrnihat.
U la ong ruh, ba ia kitei ki dukan bad ki iing ym ithuh ithaw shuh ba ki dei ki jongno bad ha kajuh ruh ka por, ba ki briew kiba shong basah ha kitei ki jaka ym tip shuh ba ki dei kiba na kano ka jaka.
Shuh shuh, u la ong ruh ba ki don ki riew shim kabu kiba ju leit lum pisa na ki nongshong dukan ha kitei ki jaka ka sorkar, ha kaba ki ju lum pisa ha ka dork aba T. 50 haduh T. 200 kawei pa kawei ka dukan, ha kaba ki ju lum pisa ha kyrteng ka sorkar Assam.
Namarkata, haba iadei bad kane ka sienjam ba la shim da ka sorkar, ngi sngewdei ban ai ka jingiaroh kaba khraw eh, namar ka jingdon jong kitei ki briew kiba shna dukan beain ha kitei ki bynta harud surok, teng teng ka ju wanrah ruh ia ka jingshlei um bad kiba shait jia ha ki bynta ka Jorabat ter ter sha Byrnihat, kata ka dei tang namar ka jingdon jong kitei ki briew kiba buh dukan bad sah beain ha kitei ki jaka.
