Tang na ka daw ka jingwan ka surok 4-lane na Umiam sha Malidor ka la wan rah ka jingiakawang ktieh bad ka ding ka la klang tang na ka daw ka tyllong umbam umdih bad kum ki trai jaka pat ki sngewlyngngoh halor kane ka kam ba la ia thad sha ki Social Media bad katba ki trai jaka pat kim tip ei ei bad ym shym la don mano mano ba ia kren ia ka jinglong trai ha kaba la shu leh stad khlem ka jingtip ki trai jaka.
Kumba la pynpaw da u hymmen, u Bah Shalan Sylliang la ong ba katei ka tyllong um ka dei kaba la long trai da ka Kong Abanita Sylliang kaba long ka para khatduh jongki bad katei ka tyllong um ruh ka dei ka jaka jongki, ha kaba kum ka ing ka sem ki la ai ia ka shnong tang na ka bynta ban ai ia ka umbam ka umdih, hynrei kum ka shnong bad kino kino ki riew rangbah ne ki nongshong shnong kim lah ban tuklar namar katei ka jaka ka dei ka jaka ba la long trai da ka Kong Abanita Sylliang.
U la pynpaw ruh ba kum ka trai jaka kim kwah ba kiwei kin tuklar ia katei ka tlong um, ha kaba ha ka jingshisha ha u snem 2022 la ai sha ka shnong na ka bynta ban tan umbam umdih sha ka shnong bad hadien ba la wan ka surok 4-lane pat la shu ia leh stad da mano re mano khlem ka jingtip ki trai jaka.
Na ka liang ka trai jaka ki la maham ba mano mano kim don hok ban tuklar ia katei ka tyllong um, namar katei ka jaka ka dei kaba la long trai da ka Kong Abanita Sylliang bad ki pynpaw ruh ia ka jingsngewsih ba la wan tuklar naduh ki heh ki hain wat haduh u MP ka jylla u Dr. Ricky AJ Syngkon ia katei ka tyllong umbam khlem ka jingtip ki trai jaka ba la shul eh stad tang da mano re mano.
U la ong ruh ba ka jingshisha kane ka tyllong um la ai sha ka shnong ban pyndap ia ka umbam umdih sha ka shnong ryngkat kita ki jingkular ba ka shnong kan shna surok shaduh katei ka tyllong um bad ruh ban thung ia ki tynrai dieng, hynrei kumba long haduh mynta khlem urlong kata ka jingkular bad la mih pynban kita ki riew ieit mariang tang hadien ba wan ka surok 4-lane na Umiam sha Malidor ba ka surok ka hap ban iaid na katei ka jaka.
Namarkata, na ka liang ki trai jaka ki la pynpaw ia ka jingsngewkhia ba tang na ka daw katei ka tyllong um la mih ka jingiakawang ktieh ne ba ka ding ka la klang ha kaba la shu ia thad ha ki rynsan social media bad na ka liang ka trai jaka ki la maham ba ym don mano mano ruh ba lah ban kam trai namar katei ka jaka ba don ka tyllong um kam dei satia ba la long trai da mano mano bad lada mih ki kynrum ki kynram ki lah ban nym ai shuh ia katei ka jaka, la pynshai u Bah Shalan Sylliang kum u hymmen ka trai jaka.
