Meghalaya, Jymmang 4:
U nongialam ba rangbah jong ka seng Voice of the Peoples Party (VPP), u Bah Ardent Bassaiawmoit haba kren sha ki lad pathai khubor hadien ka jingwanpoi sha ka jaka niew vote ha madan Polo, u la ong ba ka seng VPP kan sa iakren ia ka mat jong ki kam bamsap hapoh ka jylla Meghalaya hapoh ka Ing Thawain ka Ri lane ka Parliament.
Kane ka jingkren jong u Bah Ardent Bassaiawmoit kadei ruh hadien ba u kyrtong ka seng, u Dr. Ricky AJ Syngkon u don ia ka jingkyrmen ban jop da kaba tam kput pyrshah ia u Bah Vincent H Pala, kyrtong ka seng Indian National Congress bad ka Kong Ampareen Lyngdoh, kyrtong ka seng National People’s Party (NPP) da palat lai lak tam ki vote.
Utei u nongialam ka VPP u la ong ruh ba ki la mih shibun ki jingujor halor ka jingbamsap hapoh ka jylla, hynrei ka kynhun tohkit kum ka Central Bureau of Investigation (CBI) bad ka Enforcement Directorate (ED) kim ju pynlong satia ia ki jingtohkit halor kitei ki jingkynnoh bamsap.
