Ka Mynken Christian Higher Secondary School, ka skul na Ri Bhoi, kaba la mihkhmat ia ka jylla ha ka U-17 International Subroto Cup 2024 ha Nongbah Delhi, ka la rung sha ka Final bad kata ka dei hadien ba ka la lah ban pynliem noh ia ka Goverment Higher Secondary School Yazali na Arunachal Pradesh da 7-0 ha ka jingiakhun Semi-Final kaba la long mynta ka sngi ha Delhi.
Ha ka jingiakhun Semi-Final kaba la long mynta ka sngi, ki rangialehkai ka Mynken Christian HSS, ki la lah ban ialehkai bha shibun ban haba nujur bad ki khynnah na Arunachal Pradesh, ha kaba tang ha ka kylla step ka jingiakhun ki la lah ban tam da 2-0.
Haba bteng ka kylla miet, ki rangialehkai ka Mynken Christian HSS, ki la lah ban lehkai bha shuh shuh bad ha kaba kum katei ka por ki la ïoh shibun ki kabu ban pynkhih jar bad ha ka kylla miet, ki la ïoh thep sa 5 kol bad kaba la biang pura ia ka Mynken Christian HSS ba kan rung sha ka phainal hadien ba ki la pynliem ia ka Goverment HSS Yazali da 7-0.
U Bangangson Nongphlang, u la long kum u namtam ha katei ka jingiakhun Semi-final, namar u la ïoh ban khur hat-trick da kaba thep lai kol, uba ïoh ruh ban khur hat-trick ha ka jingiakhun Quarter Final.
Lyngba kane ka namjop ha ka Semi-final, ka Mynken Christian HSS kan sa iakhun pyrshah ia ka Manipur ha ka U-17 International Subroto Cup, hadien ba ka Manipur ka la lah ban pynliem noh ia Srilanka da 1-0.
