Ka Ri Bhoi College, kum kawei na ka shlem ai jingnang jingstad ia ki khun samla ka Ri Bhoi, mynta ka sngi ka la rakhe ia ka jingiaid lynti ba 40 snem naduh ba la seng ia kane ka College bad kumjuh ruh la kynmaw burom bad leh burom ia u (L) R.I Masharing, uba dei u Principal ba nyngiong. Kane ka College la seng ha u snem 1884 bad mynta ka la long kum kawei ka shlem ai jingnang jingstad ia ki samla bad khamtam na ka bynta kito ki samla ba wan na ki longïing baduk ba kyrduh.
Ia kane ka jingrakhe dap 40 snem ka College la wan ban shim bynta da u Bah Mayral Born Syiem MLA ka Nongpoh kum u Kongsan bad la sakhi lang ruh da ka jingdon lang u Principal u E.C Benny, kiba haïing hasem jong u (L) R.I Masharing, u Bah R.R Makdoh, ki nonghikai, ki samla pule bad ruh ki dkhot nongialam ka Ri Bhoi College Students’ Union (RBCSU).
Haba ai jingkren ha kane ka sngi, u Principal ka College u E.C Benny, u la ai ka jingiaroh ia ka RBCSU, kaba la shim khia ban pynlong ia kane ka prokram rakhe dap 40 snem ka College bad u la iaroh ruh ia ka jingiohi jngai ki riew rangbah kiba la seng ia kane ka College, kaba la ieng bad tynshain haduh kine ki sngi.
U la ai jingiaroh ruh ia u (L) R. I. Masharing, ha kaba ha ka jingialam jong u kum u Principal la lah ban seng ia kane ka College kaba la kiew shaphrang ha baroh ki liang. Ka jinglen lade u Principal bad kiwei kiba la sdang ban seng ia kane ka College, ka dei kawei na ka dawbah ba kane College ka ieng ban ai jingnang jingstad ia ki samla.
Haba kren ha kane ka sngi kum u kongsan u Bah Mayral Born Syiem MLA ka Nongpoh u la ban khia jur halor ki kam bah ba la leh da u (L) R.I Masharing, uba la mad shibun ki jingeh ha kaba seng ia kane ka College bad dei lyngba ka jingiatrei lang na baroh kiba la don bynta kane ka College ka ieng mynta ban dang bteng ka jingshakri na ka bynta ban ai jingnang jingstad bad ruh ba kyntiew ia ka jingnang jingstad hapoh ka them Ri Bhoi.
Shuh shuh, u la buh ruh ka jingkyrpad ia ki samla pule ba kin long kita ki iktiar ba khlain ban pule sha ki kyrdan kiba shaneng khnang ban mih shibun ki riew khraw na ka them Ri Bhoi bad kum u Nongmihkhmat paidbah u la kular ruh ban kyrshan bad ban ai ka jingiatrei lang na ka bynta ban dang kyntiew ia kane ka shlem ai jingnang jingstad ia ki samla ka dong Ri Bhoi bad ha ka jylla hi baroh kawei.
La pynphuh pynphieng ruh ha kane ka sngi da ki jingrwai, ki jingshad bad kiwei kiwei ki prokram ba la shim bynta da ki samla pule bad ha kajuh ka por la ai burom ruh ia kito ki nongseng khamtam ia u (L) R.I Masharing, ba dei lyngba ka jinglen lade bad ka jingiaineh ba kane ka College ka la paw ha ka District bad ka jylla ban kyntiew ia ka jingnang ka jingstad.
