Ban dang pynkhlain ia ka jylli treikam ka seng na ka bynta ban shakri ia ki paidbah hapoh ka them Ri Bhoi, ka HYC Ri Bhoi District mynta ka sngi ka la lah ba pyniar sa kawei ka shnat treikam ba la tip kum ka HYC Killing Unit, ha kaba ia ki nongialam la pynskhem bad pynbam smai kum kita ki nongnialam ba pura ka seng.
Ia ka jingialang pynskhem ne pynbam smai la pynlong ha Dorbar Hall ka Shnong Killing, ha kaba la don ryngkat naduh u Samla Shymphang Masharing, General Secretary, u Samla Tony Shylla, General Secretary, u Bah Warness Lamin, Vice President bad kiwei kiwei ki nongialam.
Ki nongialam ba pura ka HYC Killing Unit ki kynthup ia u President ba la jied ia u Samla Bisharlang Rupasi, u Samla Shanbor Bandara bad u Samla Philos Tariang kum ki Vice President, u Samla Everlasting Lamin kum u General Secretary bad kiwei kiwei ki nongialam.
La ai jingkren ruh ha kane ka sngi da u Samla Tony Shylla kum u General Secretary ka HYC Ri Bhoi, uba la kyntu ia kine ki nongialam ban shim ia ka lyngkor nongialam na ka bynta ban kit ban bah ia ka eh ka shon ki paradoh ki parasnam ha katei ka thain Killing.
Shuh shuh, u la pynpaw ruh ba ka seng HYC ka don ia kata ka thong ban wan rah ia ka jingiatylli hapdeng ki para samla hapoh ka jylla bad ka thong hi ka long ban trei shitrhem na ka bynta ka imlang ka sahlang hapoh ka jylla lyngba ka shatri jong ka seng HYC.
