U MP ka Congress na Tura u Saleng A Sangma hynnin ka sngi Nyngkong u la leit ban jurip ia ka North Eastern Indira Gandhi Regional Institute of Health and Medical Sciences (NEIGRIHMS), hadien ba u la shah jied kum u member ka Governing Council katei ka jaka ai jingsumar.
U Saleng A. Sangma ha kane ka jingleit jurip u la pyniaid ruh ia ka jingialang ban ia kren ne ia tai sani halor ka jinglong jingman katei ka NEIGRIHMS kum kawei na ka jaka ai jingsumar ha Nongbah Shillong kaba shakri na ka bynta ban ai jingsumar ia kiba pang ba shitom ha ki jylla shatei lam mihngi ka ri India.
Kum u MP bad u dkhot ka Governing Council, u la iathir bad wad bniah ruh na ki nongtrei katei ka jaka ai jingsumar bad kynthup ruh bad ki heh jong ki tnad ai jingsumar bapher bapher ka NEIGRIHMS.
Haba ai jingkren ha kane ka sngi, u MP ka Tura u Saleng A. Sangma u la pynpaw ka jingkmen ba u la ioh ia ka lad ban leit iuh kjat ha katei ka jaka ai jingsumar bad ka jingthmu kaba kongsan kaba u la leit ban iuh kjat ka long ban tip ha ki liang baroh ki jingduna kiba don ha katei ka jaka ai jingsumar.
U la ong ruh ba un sa shim khia ruh ban ia kren sha ka sorkar kmie halor ki jingduna kiba dang don hapoh katei ka jaka ai jingsumar, namar ka jingangnud jong u ka long ban pynkylla ia kane ka jaka ai jingsumar kum kawei na ka jaka ai jingsumar kaba biang tam ban ai kata ka jingshakri kaba paka ia kiba pang ba shitom ym tang ia ki paidbah ka jylla Meghalaya, hynrei ia ki paidbah jong ka jylla shatei lam mihngi ka ri India.
Kumba la pynpaw ruh da u Prof. Nalin Mehta, u la ai ka jingiaroh ia u MP uba la wan ban iuh kjat ia kane ka jaka ai jingsumar ban tip ia ki jingduna kiba don hapoh jong ka bad u la pynpaw ruh katto katne ki jingduna ki kynthup ka jingduna ki nongtrei bad ruh ka jingdonkam ban tei ia ka ing na ka bynta kito kiba wan ai jingsumar ha kane ka jaka ai jingsumar.
