Ka Syria ka la long kum ka lahduh ha ka Intercontinental Cup 2024, kata ka dei hadien ba ka la lah ban pynliem da 3-0 pyrshah ia ka kynhun ialehkai phutbol ha India.
Ka jingiakhun hapdeng ka India pyrshah ia ka Syria, la pynlong ha GMC Balayogi Stadium, ha kaba ka Syria ka la ioh ban pynkhihjar nyngkong lyngba u Mahmoud Al Aswad ha ka minit ba 7 jong ka jingiakhun bad kiba la pynkut ia ka kylla step da kaba ka Syria ka tam ia ka India da 1-0.
Haba bteng ka kylla miet jong ka jingiakhun, ka Syria ka la nion tyngeh ia ka India bad ha kaba kum katei ka por ba ka jingiakhun ka la nangiaid shakhmat bad poi artad sha ki minit ban kut ka jingiakhun, ka Syria ka la ioh biang ia ka kabu ban thep kol ia kaba la thep da u Daleho Mohsen Irandust ha ka minit ba 77 jong ka jingiakhun bad sa ka kol na u Pablo Sabbag ha ki minit pynjlan, ka la pynlong ia ka India ba kan shah rem da 3-0 hakhmat ka Syria.
Ha ka Intercontinental Cup 2024, ki don lai tylli ki ri kiba la iashimbynta, kita ki kynthup ia ka India, ka Syria bad ka Mauritius, ha kaba ia ka rukom ialehkai la pynwandur ha ka rukom jong ka League, kaba mut ba ka kynhun kaba khur bun poin, ba kan long kum ka nongjop ha katei ka lympung.
Ka kynhun ialehkai phutbol ka Syria ka la jop ha baroh ki arsien iakhun, kata ka la jop ia ka Mauritius da 2-0 bad ia ka India da 3-0. Katba ka India ka iakhaid khlem iohthep kol ha ka jingiakhun pyrshah ia ka Mauritius bad shah rem noh hakhmat ka Syria.
