Ki saw ngut ki Nonglute kiba leit lute na kawei ka Kali kit Dohkha ki la shah kem noh ha ki Pulit ka Ri Bhoi, kaba dei hadien ba ki la lute bad shoh ia u dribar bad u nongbut katei ka Kali kit dohkha kaba la jia ha Shangbangla ba hap ha ka surokbah National Highway-6 ha Ri Bhoi District.
Kane ka jingjia ka la jia mynta ka sngi ha ka por 1.16 baje ei ei mynstep ha kaba kawei ka Kali Bolero Camper ba la niah da u Abu Sadek bad u MD Dildar Hussain na Moirigaon Assam, ki la shah lute ha Shangbangla ha kawei ka Kali Alto kaba don ia u Number AS -1 FN 4202, ba kitei ki nonglute ki la pynsangeh da ka bor ban shoh ban bom ia ki bad ruh ban lute ia ka pisa bad ki Mobile Phone.
Kumba la ioh lum jingtip, dei hadien ba ki Pulit ka Ri Bhoi ki la ioh jingtip ia kane ka jingjia, ki la pynlong ia ka jingpahara kaba jur (Mobile Patrolling) ba la ialam da u Sub Inspector u S.R Marak ba ki la pynlong ia ka jingpynshrip ha kylleng ki jaka jong ka Nongpoh bad dei hadien ka jingthwet kaba jur ki la ioh ban kem nyngkong ia u Ricky Tangsang bad u Mustafa Lyngdoh u la lait pher ha ka jingiakhun ban ioh lait na ka kti jong ki Pulit.
Nalor kitei ki ar ngut kiba la shah kem u Ricky Tangsang bad u Mustafa Lyngdoh, ki 2 ngut pat kiba la ioh kem hadien ki kynthup ia u Kyrshanbor Marwein bad u Shem Wajri, kaba dei lyngba ka jingiarap lang ban thwet jur da ki SOT bad ki Pulit CRPF.
La iathuh ruh hadien nalor katei ka Kali Alto ba la ioh ban kurup, ki Pulit ki la ioh kurup ruh ia kawei ka kali Baleno ba don ia ka rong lieh bad kaba ym pat don number satia. Ia kitei ki saw ngut kiba la shah kem la rah noh sha Civil Hospital ban pyndep ia ka medical examination ryngkat u dribar bad u nongbut ba shah lute
Shuh shuh, la ong ruh ba ki Pulit hadien ba la ioh pdiang ia ka ejehar pyrshah ia kine ki nonglute, ki la register case pyrshah ia kitei ki nonglute katkum ki kyndon ain bad ka jingtohkit halor kane ka kam lute ka dang shakhmat ban lap dien ia kiwei ruh kiba don kti ha kane ka kam lute.
