Wat la ka long ka jingduhnong kaba khraw bad ka jingshah iehnoh khunswet ki nongialam bad ki nongkyrshan ka party Congress ha Ri Bhoi, kaba dei hadien ba u MLA ka Mawhati u Bah Charles Marngar bad u MLA ka Umsning u Dr. Celestine Lyngdoh ki la leit ban pyniasoh sha ka paty NPP, hynrei ka Party Congress ha ka lama jong ka Ri Bhoi District Congress Committee (RBDCC) ki la lah ba jied biang da ki nongialam ba thymmai ka Party Congress ha Ri Bhoi District.
Kum ban pynkynmaw, u Bah Charles Marngar, MLA ka Mawhati bad uba dei u President ka Party Congress ha Ri Bhoi ryngkat u Dr. Celestine Lyngdoh MLA ka Congress na Umsning dang shen ki la leit ban pyniasoh sha ka party NPP bad hadien ka jingshah iehnoh bein ha kine ki MLA ka party Congress ha ka Sngi Balang ka la jied biang ia ki nongialam ba pura ka party ha ka jingialang kaba la long ha Rain Drop Conference Hall, Saiden.
Kine ki nongialam ba thymmai ka Party Congress ha Ri Bhoi ki kynthup ia u President ba la jied ia u Bah M.G Kharshanlor, Working President: G.S. Shadap, Senior Adviser: Standliwiss Rymbai, Adviser: Adrian Chyne Mylliemngap, Vice Presidents: Rocky Marwein, Phrang Syngkli, Rev. P.W. Pnar, Shalwist Mallai, General Secretary: Defender S. Lamare bad kiwei kiwei ki nongialam ba hakhmat ka party.
Naduh u President ba thymmai U Bah M.G Kharshanlor, u Senior Adviser u Bah Standliwiss Rymbai bad u Working President u Bah G.S Shadap, ki la pynpaw da kaba ong ba ka jingphet seng noh ki 2 ngut ki MLA ka Congress kam shym la ktah ia ka party Congress ha Ri Bhoi, namar ha Ri Bhoi District ki paidbah ki don ia ka jingshaniah ha ka party Congress.
Ki la pynpaw ruh da kaba ong ba ki paidbah nongkyrshan bad ki nongialam kim dei ban rit mynsiem da ka jingphet noh kitei ki 2 ngut ki MLA ka Congress bad kum ka party hadien ba la jied biang ia kine ki nongialam ba thymmai kan dang iaid bteng ka jingshakri ha Ri Bhoi na ka bynta ban dang pynkhlain bad ban tehsong ia ka jingiatylli ka party Congress ha Ri Bhoi District.
