Ka North East Students’ Organization (NESO) mynta ka sngi Palei jong ka taiew ka la dawa syndon na u Myntri Rangbah ka ri u Narendra Modi bad u Myntri ka tnad ka kam pohïing ka sorkar pdeng u Amit Shah ban shim khia na ka bynta ban tehlakam ne ban shim khia ban tehlakam noh ia ka jingiaumsnam ha ka jylla Manipur kaba la neh mynta la 16 bnai ei ei.
Ha ka dorkhas ba la phah sha u Myntri rangbah ka ri, u Narendra Moidi bad sha u Myntri ka tnad kakam pohïing ka sorkar pdeng u Amit Shah, ka NESO ka la dawa mardor ban thung noh da ka High Level Peace Committee na ka bynta ban pynneh ia ka shongsuk shongsain hapoh ka jylla Manipur.
“Ngi kyrpad na u myntri rangbah ka ri, ban nym sngap jar bad ban leit jurip ia ka jylla Manipur na ka bynta ban tip ia ka jinglong jingman da lade shimet bad ruh ban pynbiang ia ki bor pahara ia ki paidbah jong baroh ar tylli ki jaid bynriew Kuki bad Meitei khamtam ia ki kynthei bad ki khyllung khynnah, kaba la ktah shisha da katei ka jingiaumsnam kaba la leh la slem ha ka jylla Manipur. Ka jylla Manipur ka donkam ia ka jingshim khia ka sorkar pdeng ban weng noh ia kitei ki jingeh kiba mih na ka jingiakynad hapeng ar jaid bynriew bad ba ka jingiaumsnam ka dei ban kut noh” ong u Chairman ka NESO u Bah Samuel B. Jyrwa ha katei ka dorkhas.
U la ong ruh ba ka jingsngap jar u myntri rangbah ka ri, u Narendra Modi, uba haduh mynta um shym la leit iuh kjat ha ka jylla Manipur, ka dei ruh ka daw ba ym lah ban tem ia katei ka jingiakynad bad lada kane ka jingiakynad ka dang bteng kiba jynjar pat ki dei ki riew paidbah.
“Ka jingiakynad ha ka jylla Manipur ka la long kaba shyrkhei bad la donkam ban don ka jingkitkhlieh na ka sorkar pdeng. Ka jingbym lah ban shim khia ban weng ia kane ka jingiakynad ka ktah ym tang ia ka jylla Manipur bad ka ktah ruh ia ka shongsuk shongsain ha ki jylla shatei lam mihngi ka ri India hi baorh akwei. Ka NESO ka kyrpad jur ia ka sorkar India ban shim khia halor kane ka phang bad ruh ban shim ia kita ki lad ki lynti na ka bynta ban wan rah biang ia ka shongsuk shongsain ha katei ka jylla” ong u Bah Jyrwa.
La ong ruh na ka NESO ka ka kyrpad ban thung ia ki dkhot ha kahigh-level peace committee, k ban ia don lang na ki jaid bynriew bapher bapher, na ka bynta ban ioh ban ia kren ne syllong ban wan rah noh ia ka shongsuk shongsain ha katei ka jylla.
Ha katei ka dorkhas ka NESO ka la pynpaw ruh ia ka jingsngewkhia, halor ka Nongrim ba tang na ka daw ka jingiakynad hapdeng ki ar jaid bynriew ka la wan rah ki jingjia ba sngewsih bad bun ki mynsiem ba kordor ki la duh noh ia la ka jingim, ka jingpynjot ia ki jingdon jingem bad kaba wan rah ruh ia ka jingtieng jingsyier ia ki paidbah ha baroh ka jylla.
Shuh shuh, katei ka dorkhas la pynpaw da u Chaiman ba ka NDESO ka angnud ban wan rah ia ka jingiatylli bad ban sangeh noh ia ki kam ia um snam hapdeng kitei ki ar jaid bynriew, namar lada kane ka jingiakynad ka dang bteng ka long ka jingsngewkhia kaba jur ba bun ki mynsiem ba lui lui kin duh noh bad la donkam ba ka sorkar pdeng kan shim khia ban wan rah ia ka jingsuk da kaba thaw ia ki lad ki lynti bad khamtam ban pynbiang ia ki bor pahara ban tem ia kane ka jingiakynad.
Khatuh eh u Bah Jyrwa u la pynpaw ha katei ka dorkhas, ba ka NESO ka iengskhem ban wan rah ia ka shongsuk shongsain bad ban ai ia ka jingbishar kaba hok ha ka jylla Manipur bad kumjuh ruh ha ki jylla shatei lam mihngi ka ri India kaba long ka thong ban wan rah biang ia ka shongsuk shongsain hapoh katei ka jylla.
