Ka khubor kaba sngewsih kthang ym tang ia ki bahaiing hasem ne kiba ieid ba thoiñ, hynrei ka long ka khubor kaba sngewsih wat ia ka Nongthymmai Constituency hi baroh kawei ha kaba ha ka janmiet jong ka 12 tarik u Nailur 2024, u MDC kane ka Constituency u Bah Latiplang Kharkongor u la khlad noh na kane ka sla pyrthei hadien ka jingpang kaba la ban kham slem.
Ka jingkhlad noh jong u Bah Latiplang Kharkongor, MDC ka Nongthymmai Constituency bad u ba dei ruh u CEM barim ka Khasi Hills Autonomous District Council (KHADC), la pynbna ha ka janmiet jong ka 12 tarik Nailur hapoh ka Civil Hospital, Shillong.
Lah ban kdew ruh, ba u Bah Latiplang Kharkongor u ba la don hapdeng ka jingshitom mynta la kham slem, dang shen u la leit ban shah sumar ruh sha Nongbah Delhi.
Tang mar ia ioh jingtip halor kane ka khubor kaba sngewsih, na ka liang u Chief Executive Member ka KHADC u Bah Pyniaid Sing Syiem, u la leit mih sha Civil Hospital Shillong, ban pynpaw ia ka jingsngewlem halor ka jingduh noh kaba khraw ia u wei na ki nongialam ba tbit u ba la shakri paidbah lyngba ka Khasi Hills Autonomous District Council.
Na ka liang ka KHADC, ka la pynbna ruh da ka shuti shiteng sngi ha ka 13 tarik Nailur shibynta ban pynpaw ia ka jingsngewsih bad ka jingsngewlem halor ka jingduh noh ia u ne u nongialam ka KHADC na Nongthymmai Constituency.
