Halor ka jingkhlad noh u CEM barim ka KHADC bad uba dei ruh u MDC ka Nongthymmai Constituency, u Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem u la phah ia ka khubor sngewlem sha ka ing ka sem halor ka jingduh noh ia une u nongialam ka jylla.
Kum ban pynkynmaw, u Bah Latiplang Kharkongor, MDC ka Nongthymmai bad uba dei ruh u CEM ka KHADC u la khlad noh ha ka janmiet jong ka 12 tarik u Nailur 2024 ha Civil Hospital Shillong, kaba dei hadien ka jingban jong ka jingpang jingshitom kaba la neh kham slem.
Kum u CEM ka KHADC, u Bah Pyniaid Sing Syiem, u la pynpaw ia ka jingsngewduhnong kaba khraw halor ka jingkhlad noh u Bah Latiplang Kharkongor bad na ka liang ka KHADC ka phah ia ka khubor sngewlem sha ka lok, ki khun ki kti bad ka ing ka sem halor ka jingduh nong ia une u rangbah uba dei uwei na u nongmihkhmat ha ka KHADC na Nongthymmai Constituency.
Shuh shuh, halor kane ka jingkhlad noh u Bah Latiplang Kharkongor, na ka liang ka KHADC ka la pynbna ban ai shuti shiteng sngi ha ka 13 tarik u Nailur kum ka dak ka jingsngewlem halor ka jingkhlad noh u wei napdeng ki MDC ka KHADC.
