Ka sorkar Assam lyngba ki bor ba dei khmih jong ka tnad Sonapur Reveue Circle jong ka Kamrup Metro ki la lah ban pynioh biang ia palat kumba 248 Bigha jong ka jaka sorkar da kaba weng ia kumba 237 tylli ki ing kiba la shna ing beain da ki paidbah ha ki bynta jong ka thain Sonapur, kaba hap hapoh ka jingkhmih jong ka Kamrup Metro.
Katei ka jingkyndang ia kitei ki ing kiba la shna beain ha katei ka thain ka dei kaba la sdang naduh ka 9 tarik u bnai Nailar 2024 bad hynnin ka sngi, ka 12 tarik jong jong u bnai Nailur 2024, ki ophisar sorkar lem bad ki bor pulit kiba don bynta ha katei ka kam, ki la shah hiar thma kynsan ha ki paidbah da ka jingthmu ban pyniap. Ha kane ka jingjia, kumba 22 ngut ki ophisar sorkar, katkum ka kaiphod ba la ioh lum, ki la mynsaw bad napdeng jongki, ki la don ruh kiba mynsaw jur.
Halor katei ka jingjia, na ka liang ki bor pulit ka jylla Assam ruh, ki la pyndonkam da ka bor ban tem ia katei ka jinghiar thma jong ki paidbah, ha kaba la ioh jingtip ba ki la don kumba 13 ngut kiba la mynsaw jur, bad 2 ngut na kitei, ki la khlad noh ha ka jaka ai jingsumar.
Na ka liang jong u Director General ka Assam Police, u GP Singh u la bthah ia ki pulit ka nongbah Guwahati ba kin pynlong ia ka jingtohkit kaba bniah ban lapdien ia baroh ki runar kiba donkti ban hiar thma ia ki ophisar sorkar bad pulit bad ruh pynshitom iaki katkum ki kyndon jong ka ain.
