Mynta ka sngi ki khynnah ialehkai phutbol ka Mynken Christian Higher Secondary School, ki la wanphai iing na Nongbah Delhi bad hadien ba ki la shah rem noh ha ka jingiakhun phainal pyrshah ia kawei ka skul na ka jylla Manipur ha ka International Subroto Cup Football Tournament 2024.
Lyngba jong katei ka sngi, ba kitei ki rangialehkai ha ryngkat ka jingdon ki Coach lem bad ki nongialam ia katei ka kynhun, ki la wanphai sha ka jylla, ki la shah pdiang burom ha ka seng KSU, ia kaba ki la pdiang burom ha Indoor Stadium Umlyngkdait ha Nongpoh bad hadien kata ki la shah pdiang burom ha ki nongialam ka RBDSA ha Nongthymmai bad haba ki la poi ha Umiam ki la ioh ia ka jingshah pdiang sngewbha ha ki bor pyniaid ka skul Mynken Hogher Secondary School, Bhoirymbong.
Kane ka jingpdiang burom ka seng KSU bad ka RBDSA ka la long ka jingai mynsiem ia katei ka kynhun bad sha ki bor pyniaid skul ka Mynken wat la ka la shah rem ha ka jingiakhun phainal ha Nongbah Delhi. Kane ka jingwan poi ka kynhun mynta ka sngi ka dei ruh hadien ba katei ka kynhun kaba mihkhmat ia ka jylla Meghalaya ha ka kyrdan under-17 jong ka 63 international Subroto Cup 2024 ha Nongbah Delhi, ka la wan phai da ka nam ka burom kum ka kynhun ba wan baar napdeng ki skul bapher bapher ha ri India bad wat na shabar ka ri India kiba la wan shim bynta ha katei ka lympung ialehkai ba la tip kum ka International Subroto Cup 2024.
