Hadien ba ka Hynniewtrep National Youth Front (HNYF) Northern Region ha Ri Bhoi District ka la dep ban jied dang shen ia ki nongialam ba thymmai na ka bynta ka samoi treikam jong u snem 2024-2027, na ka laing ka seng kmie mynta ka sngi ha ka jingialam u Bah Sadon K. Blah kum u President ba rangbah ka la lah ban pynskhem ia kine ki nongialam ha Ri Bhoi ban shim ia kata ka lyngkor nongialam kiba dei katkum ka riti treikam jong ka seng.
Ia kne ki nongialam ba ka seng HNYF la pynskhem ha ka jingialang ba la pynlong ha Auditorium Hall ka Umsning Town Dorbar da u Bah Sadon K. Blah kum u President ba rangbah ka seng, uba la pynbam smai ia ki katkum ki riti treikam jong ka seng HNYF.
Ha kane ka sngi la wan shim bynta ruh da u Bah Mayral Born Syiem, MLA ka Nongpoh kum u kongsan bad u Bah Cornelius Laloo kum uwei u nongthoh Khubor ka jylla kum u symbut kongsan. Kiwei kiwei kiba la ia don lang ki kynthup ia u Chairman ka Usmning Town Durbar u Bah Rocky Kylla, ki riew rangbah bad ruh ki nongialam bad ki dkhot ka HNYF na kyleng ki Circle bad Unit na Ri Bhoi lem bad ki nongialam na ka sengkmie.
Kine ki nongialam ka HNYF ba la pynskhem mynta ka sngi ki kynthup ia u ia u Bah Headsing Lyngdoh kum u President, u Bah Alfred Malai kum u General Secretary, u Bah Edelbert Nongrum kum u Vice-President lem bad kiwei, kiba la bat ia ki kyrdan batkam bapher bapher.
Na ka liang u Bah Sadon K. Blah haba ai jingkren ruh ha kane ka sngi, u la kyntu jur ia kine ki nongialam ba thymmai ka seng ba kin shim shisha ia ka lyngkor jong ka jingkitkhlieh ban trei na ka bynta ka seng bad haba ong ba trei na ka bynta ka seng ka Nongrim ka long ban shakri ia la ka jaid bynriew.
u Bah Mayraldborn Syiem bad u Bah Cornelius Laloo, ki la pynpaw ia kata ka jingkmen ba ki la shah khot sngewbha ha katei ka sngi ba la pynskhem ia ki nongkitkam ba pura ka HNYF Northern Region.
Ki la pynpaw ruh da kaba ong ba ka jingdon ki seng bhalang ka dei kaba ai jingmyntoi ia ki paidbah, namar kum ki seng bhalang ki long kita ki jingkieng ban pyniasoh sha ka sorkar, ha kaba kano kano ka mat kaba ktah ia ki paidbah kin pynsngew sha ka sorkar bad kum ka sorkar ruh ka hap ban lei ei ei na ka bynta ka jingbit jingbiang ki paidbah hapoh ka jylla.
Shuh shuh, nalor shibun ki symboh pyrkhat ba ki la ai sha kine ki nongialam ka seng HNYF, ki la buh ruh ka jingkyntu ba kin ai ka jingshakri kaba bha tam sha ki paidbah bad ki kloi ruh ba ai ka jingiatrie lang la ka long ha kano kano ka khep kaba ki don ia ka jingkyrshan lada kum kita ki nongialam ki pyni shisha ia ka mynsiem ban shakri hok ia ka eh ka shon u paidbah.
