Ha ka sngi ba ka kynhun ialehkai ka Chennaiyin Football Club lem bad ka Bengaluru Football Club, ki la sdang ban ialehkai nyngkong ha ka Indian Super League (ISL) jong ka samoi u snem 2024/2025, kitei ki kynhun ki la ioh ban khur ia ka lai poin, hadien ba ki la lah ban pynliem ia ki kynhun ba ki iakhun pyrshah.
Haba phai ha ka jingiakhun kaba mynta ka sngi ha ka ISL, ka jingiakhun kaba nyngkong ka dei kaba la long hapdeng ka Odisha FC pyrshah ia ka Chennaiyin FC, ha kaba ka Chennaiyin FC ka la lah ban pynliem ia ka Odisha FC da 3-2.
Ka jingiakhun hapdeng kitei ki kynhun, ka la long ba ka Odisha FC ka la ioh ban pynkhihjar nyngkong lyngba u D. Mauricio uba la ioh ban thep kol ha ka minit ba 9 jong ka jingiakhun, ia kaba u la thep kol ha ka dur jong ka penalty bad kiba la pynkut ia ka kylla step, da kaba ka Odisha FC ka tam ia ka Chennaiyin FC da 1-0.
Haba bteng ka kylla miet jong ka jingiakhun, ki rangialehkai ka Chennaiyin FC, ki la pyrshang ban ialehkai bha bad ha kaba kum katei ka jingiakhun, ki la ioh ban pynkhihjar lyngba u F. Choudhary uba la ioh ban thep kol ha ka minit ba 48 bad ha ka minit ba 51, hadien kata pat sa na ka kol kaba la thep da u D. Chukwu uba la thep ha ka minit ba 69. Katba ka jingiakhun ka la iaid shakhmat, ki rangialehkai ka Odisha FC ki la pyrshang ban pynphai ia kitei ki kol ba ki la shah thep, hynrei kim lah ban thaw pyrthei eiei ruh em, pynban ka bok ba ki la ioh ban pynphai ka la jia ha ka minit ba la jan kut artad ka jingiakhun, ia kaba la thep da u R. Krishna bad haduh ba kut ka jingiakhun, ka Chennaiyin FC ka la lah ban pynliem ia ka Odisha da 3-2.
Katba haba phai ha ka jingiakhun kaba la long hapdeng ka Bengaluru FC pyrsha ia ka East Bengal FC, ka Bengaluru ka la ioh ban khut ia ka namjop ha katei ka jingiakhun bad kata ka dei lyngba ka kol kaba la thep da u V. Venkatesh uba la ioh ban thep kol ha ka minit ba 26 jong ka kylla step bad kaba la neh haduh ba kut ka jingiakhun.
Ha katei ka jingiakhun hapdeng Bengaluru FC pyrsha ia ka East Bengal FC, u Lalchungnunga uba dei u rangialehkai ka East Bengal u la shah behnoh na madan ialehkai, hadien ba u la iohpdiang ia ka Red Card na ki nongpyniaid ia katei ka jingiakhun.
