PDIANG BUROM KA TNAD PULIT RI BHOI IA 2 NGUT KI PULIT BA IOH KHUR TAKMA KSIAR NA LUCKNOW

Kum ka jingsngew sarong bad ka burom ba ki la wan rah ia ka tnad Pulit ka jylla na ka lympung ialehkai jong ka ‘73^rd All India Police Wrestling Cluster 2024’  na Lucknow, ka tnad Pulit Ri Bhoi ki la leh burom ia kine ki ar ngut ki Pulit kiba ioh khur ia ka takma ksiar da kaba ai syntiew bad ai burom hadien ba ki la wan poi hynnin ka sngi ha Guwahati Airport.

Kine ki 2 ngut ki Pulit ka jylla kiba la ioh khur ia ka takma ksiar ki kynthup ia u Alan S. Marbaniang na ka Ri Bhoi DEF bad ka Wp/BNC Wandalin Syieimiong na ka 6^th MLP Battalion.

Kum ka jingsarong bad ka burom ba kine ki rang bad ki thei ialehkai Arm Wrestling na ka tnad Pulit ki la ioh khur ia ki takma ksiar, na ka liang ka tnad Pulit na Ri Bhoi hynnin ka sngi, ki la leit ban pdiang burom naduh na Guwahati Airport hadien ba kitei ki 2 ngut ki Pulit ki la wan phai ing na katei ka lympung ryngkat kitei ki takma ksiar na katei ka lympung iakhun kti ha Lucknow.

Na ka liang ka tnad Pulit Ri Bhoi bad ruh ka tnad Pulit ka jylla ki la ai khublei kyrpang ia kine ki 2 ngut ki Pulit halor kane ka jingjop bad ki ai ruh ka jingkyrkhu kyrdoh ba kin dang kiew shaphrang ha ka jingim bad ruh ba kin dang lah ba pyndonkam hok ia ka sap kaba ki don ha kane ka jingialehkai ia khun kti ba la tip kum ka Arm Wrestling.