Haba kren ha ka jingialang ban pynskhem ne pynbam smai ia ki nongialam ba thymmai ka Hynniewtrep National Youth Front (HNYF) Northern Region ha Ri Bhoi District, ha ka jingialang kaba la long ha sngi Saitjain ha Auiditorium Hall ka Umsning Town Durbar, u President ba rangbah ka HNYF u Bah Sadon K. Blah u la kynnoh ba ka sorkar India ka kloi ban khang ia ka jingtih maw tih shyiam bad wat ban tih dewiong, hynrei sha lyndet pa ka pyrshang ban thied ia ki seng bhalang, KHADC bad wat ki Minister ne MLA tang ban ioh ban tih noh ia u Uranium ha Domiasisat ba hap ha West Khasi Hills.
U la ong ruh ba ka sorkar India ka pyrshang ban khniot wat ia ka jaid bynriew da kaba khang ban tih maw tih shyiap bad wat ia u Dewiong bad ka long pat kaba sngewsih ban tip ba ka sorkar India ka phai khmat kliaw kumno ban ioh tih noh ia u Uranium uba mar poh khyndew ba bha tam da kaba kan pyrshang ban thied ia baroh wat ia haduh ki bor sorkar.
U la iathuh ruh ha ka jingwan ka UCIL ban ia kren halor kane ka phang jong ka jingtih Uranium, ka UCIL ka shu pynbiej ban shu tih na kane ka jylla bad ban rah pat shawei na ka bynta ban sain ia u Uranium, da kaba pynbiej ruh ban ai kam tang haduh 30 snem ia kito ki trai shnong bad kiba shah ktah na ka jingtih Uranium bad u la ong kan myntoi aiu ban ioh kam tang hapoh ka 30 snem ha kaba ka jingma pat ka ap ia ki paradoh ki parasnam shi jingim bad pateng la pateng lada ailad ban tih ia u Uranium.
Haba pynshai halor ka Nongrim treikam ka HNYF, u Bah Sadon K. Blah u la kren shai ba ka HNYF haduh kine ki sngi ka ieng halor ka Nongrim kaba dei katkum ka ‘Instrument of Accession’ bad ka long pat kaba sngewsih ba ka sorkar India ka iuhroit ne khniot bein ia ka jaid bynriew da kaba shu pynap da ki ktang suloi bad la shu pynbor jubor ban long kita ki Nongshong shnong ka ri India khlem da burom satia ia ka Instrument of Accession (IoA) ba la dep ban ia soi soskular hadien ka jingsynshar ki pharang kata ha ki snem 1947-1948.
U la pynshai ruh da kaba ong ba ngi dei ba sngewthuh shai ba ka jaid bynriew hynniewtrep kam dei satia kata ka jaid bynriew ba shah teh mraw naduh ki por ba synshar ki Syiem Muslim hapoh ka ri India bad kam dei ka jaid bynriew kaba long nongshong shnong ka ri India bad ruh wat hadien ka jingsynshar ki phareng ruh ka jaid bynriew kam shym la iasoh bad ka ri India.
“Dei hadien u snem 1947-1948 ba ka sorkar phareng ka la ieh noh ia ka ri India, ki khlieh nongsynshar ki la soi da kata ka Instrument of accession ha kaba la pdiang katkum ki dulir bad ki don ruh 3 tylli ki kyndon ha kata ka Annexed Agreement ba ka sorkar India ka lah ban shna aiñ, ha kaba kita ki long ba ka sorkar India ka lah ban pyniasoh lyngba ki surok ki lynti ki syngkien, kaba ar katkum ka annexed agremment ka dei ban pyndonkam kajuh ka Pisa bad kaba kaba ka dei halor ka Nongrim ba lada don kano kano ka jingshah thombor ne ka jingshah lehbor, ngi mynjur ban ïatreilang bad ka sorkar India kum kata ka Common Defence” ong u Bah Blah.
U la iathuh ruh wat la katta ruh la mynjur tang hapoh 2 snem ha kata ka standstill agreement, hynrei kaba sngewsih ka long ba kata ka 2 snem kam pat kut satia, ka sorkar India kala hiar thma ia ka jaid bynriew da kaba ka la shu pynap da ki tup da ki man ïaki khlieh nongsynshar kiba ieng halor ka nongrim jong ka Instrument of Accession bad ïangi la pynlong jubor kum kita ki nongshong shnong ka ri India jubor da kaba byrngem byrsit.
Namarkata, u la bynrap ruh ba ka seng HNYF haduh kine ki sngi ka dang ieng skhem halor ka Nongrim jong ka Instrument of Accession ba ngi hap babn khyllie ia ki dulir bad lada dei ba ka jaid bynriew ka hap ban pyniasoh bad ka ri India kan iasoh da ka jingsngewthuh jingmut bad ym ban shu pynbor ne hiar thma ia ka jaid bynriew, u la la bynrap.
