Kumba u symbut myntri rangbah ka jylla u Bah Prestone Tynsong u la shah sumar ia lade ha Apolo Hospital ha Nongbah Delhi, ba u dang shah puit ha ki bynta jong ka shynrong khlieh ha ICU, hynrei la pynlait noh ia u na ka jingsumar ha ICU hadien ka jingsumar jong ki Doctor.
Ia kane la pyntip paidbah katkum ka kyrwoh ba la phah da u Commissioner & Secretary ka sorkar Jylla u Vijay Mantri.
“Katkum ka CT Scan ba la dep ban leh hadien ba la shah puit haki bynta jong ka khlieh ha katei ka jaka ai jingsumar, la pynpaw ba kam don ei ei shuh (Normalcy) bad ba u symbut myntri u la ioh biang ia ka jingkoit” ong ka kyrwoh ba la pynlait da u commissioner & secretary ka sorkar jylla u Vijay Mantri.
La iathuh ruh wat la katta, ki doctor ki dang hap ban leh sa kawei ka CT scan shwa ban pynbna ba u symbut myntri u la ioh biang ia ka jingkoit shuwa ba lait noh na ka jingsumar bad la khmih lynti ruh ba ia u symbut myntri ka sorkar jylla ki doctor kin pynlait noh na ka jingsumar la kumno kumno ha ka sngi baar ban sa wan, u la pyntup shuh shuh.
