Ki bor pulit ka Jowai Police Station, kiba la pynap shrip bad iai peitngor ia ka iaid ka Ieng ki briew kiba ju donkti ban shalan drok, ha ka janmiet jong ka 18 tarik Nailur, ki la ioh ban kem ia ar ngut ki briew ha ryngkat u drok najan ka Thomas Jones College ha Jowai.
Ia kitei ki arngut kiba la shah kem la ithuh kyrteng kum u Sdangki Myrpher (35) bad u Wandao Bareh (42) kiba na Panaliar bad na ka met jong ki la ioh ban kurup ruh ia u drok heroin ba don ka jingkhia kumba 5.1 gram bad ka pisa kaba la kot kumba 31, 730 tyngka.
Katkum ka jingtip ba la iohlum, la iathuh ba la don ka jingsuba ia ka rukom iaid kum ieng jong kitei ki arngut ha jan ka Thomas Jones College bad mar mar la pyntip sha ki pulit halor ka jingsuba ban shalan drok da kine ki arngut ki briew.
Mar ia poi ki pulit kiba iaid pahara ki la bat ia kine ki arngut bad ha ka jingtohkit bad khynra na ka met jong ki la lap ia kine ki jingdih buaid bad ka pisa kumta la rah noh ia ki sha ka thanad Jowai ban pynlong ia ka jingtohkit kaba kham bniah.
