Da ka jingangnud ban pynduh pyndam noh ia ka bamsap bad ka rukom thungkam thungjam ka bym khuid lyngba ka tnad jong ka Meghalaya Public Service Commission (MPSC) hapoh ka jylla Meghalaya, mynta ka Sngi ki nongialam ka Khasi Students Union (KSU) lyngba ka Information and Publicity Cell, ki la sam ia ki kot lyngkdop ba la kdew shai halor ki 20 tylli ki mat ba la bsuh kum ki phang ban wanrah ia ka jingkylla ha ka rukom thungkam thungjam hapoh kane ka jylla.
Lah ban kdew, ba ka KSU dang ha kine ki khyndiat bnai, ki la mih shakhmat ban ia khih pyrshah ia ka tnad MPSC ban dawa pynlait paidbah ruh ia ki marksheets jong kito kiba thepkam bad pyndep ia ka eksam na bynta ka post MCS bad dei namar ka jingbym hun ia ka rukom pynbna ia ki results, ka rukom thoh eksam bad kiwei kiwei ka la nang pynsngewkhia ia ki nongialam ka KSU ban nang jam shaphrang ban iakhun ban wanrah ia ka rukom thepkam ka khuid kaba suba bad ban pynlait na ka jingjyrsieh lyngba ka rukom thungkam da kito kiba don ha ka bor (Political power).
Ha kane ka jingmih ban sam paidbah, ia ki jingthrang bad jingangnud da ka KSU lyngba ki 20 tylli ki mat, kaba hakhmat eh la rah ba ka jingthungkam naduh ki Chairman bad ki dkhot ka Committee ka dei ban long katkum ka jinglong tbit ka jong ki ym ban jied lyngba ka jingiadei bad ki politics ne political power, ka jingdonkam ban pynbna paidbah ruh ban pyni ia ki jingdon jingem jong ki Chairman bad kiwei kiwei ki dkhot ka MPSC man la u snem.
Nalor, kine ki mat, ka KSU ka la ai jingmut ruh ba dei ban thaw noh da ka Directorate ban khmieh bniah ia ka kam bamsap lane ka Vigilance and Anti-Corruption, ka jingthungkam MCS bad MPS ka dei ban pynlong man la u snem, ka jingdonkam ban don noh da ki ophisar lane Cadre na la ka jylla kaba kongsan bha ba ki tip ia ka rukom long rukom man, ka kolshor treikam nalor kiwei kiwei nalor ka jing ailad ban thepkam tang ia ki nongshong shnong ka Meghalaya kiba nang ia ka ktien Khasi bad Garo.
Shuh shuh ruh, ka KSU ka ban khia ba kine ki mat ba la wanrah paidbah da ka seng ka dei ban treikam ruh ha ki District Selection Committee ban wanrah ia ka jingthungkam thungjam kaba khuid kaba suba bad ba ki samla kiba deihok kin nym duh ia la ka hok nongkynti ha ka iohkam iohjam.
Khatduh eh, ka KSU ka la thrang ba ha ka jingiatai hapoh Iingdorbar Thawaiñ kaban sa long la donkam ban wanrah ne ban pyntreikam ia ka Regulation jong u snem 1972 halor ka rukom thungkam kaba bym iashah liang lane ka Uniform Examination and Recruitment Rules ban pynlong ia ka rukom thepkam thepjam kaba khuid hapoh ka jylla Meghalaya.
