Ki nongialam ka Meghalaya Film Maker Association na ka Ri Bhoi Unit mynta ka sngi ha ka jingialam u Bah Lansius Syiemlieh kum u President bad u Bah Jamberson Marak kum u Secretary, ki la leit syndon ban ia kynduh ia u Deputy Commissioner ka Ri Bhoi District, u Abhilash Baranwal na ka bynta ban pynsngew halor ka jingdonkam ban ail rynsan lem ia ki Local Artist ban shim bynta ha ka Cherry Blossom festival bad ha kiwei kiwei ki tamasa ba ju pynlong da ka sorkar ha ka jylla.
Hadien ka jingiakynduh ia u Deputy Commissioner ka Ri Bhoi, u Bah Lansius Syiemlieh kum u President katei ka kynhun u la pynpaw ia ka mynsiem jong ka jingsngewkhia na ka bynta ki Local Artist ka them Ri Bhoi kiba ju shah kyntait ban ai rynsan ha kino kino ki tamasa bad kham tam ha ka Cherry Blossom kaba la dep ha u snemm ba la dep kim shym la ioh lad ban shim bynta bad la ioh lad pynban da kiwei ki samla kiba na shabar ka District.
U la iathuh ruh ha ka jingiakynduh ia u Deputy Commissioner ka Ri Bhoi, nalor ba la aiti ia ka dorkhas ka kynhun ka la pynsngew ba ki kwah ba ki local Artist ruh na Ri Bhoi ki dei ban ioh rynsan ha katei ka Tamasa Cherry Blossom, ba u DC u la kular ban shim khia ia kane ka kam bad kum ka kynhun ki nongshna phlim ne ki nongak phlim ki la pynpaw ruh ba kim pyrshah ia ki artist ba wan na shabar bad kaei kaba ka kynhun ka kwah ka long ba ka sorkar ka dei ban ailad ruh ia ki Local Artist na Ri Bhoi ban ioh rynsah haba ia katei ka tamasa Cherry Blossom la pynlong ha Ri Bhoi District.
U la bynrap ruh da kaba ong, ba kane ka kynhun ki nongshna phlim kam don kano kano ka jingpyrshah ia ka jingwan rah ia kino kino ki tamasa ha kane ka district, hynrei kum ka kynhun ka angnud pat ba kin pyrkhat kyrpang ia ki samla kiba don sap na kane ka District ba kin ioh rynsan lang bad lada ki ioh rynsan ka long shi bynta ban kyntiew ia ki sap ki phong ba ki don la ka lok ha kano ka bynta kaba ki don ia ki sap.
Shuh shuh, ha kawei ka bynta, u la pynpaw ruh ka jingsngewnguh ia u Deputy Commissioner ka Ri Bhoi, u Abhilash Baranwal uba la kular ban shim khia ia kane ka mad ba la wan rah da kane ka kynhun bad kane ka kynhun ka khmih lynti ruh ba ki Local Artist na ri Bhoi kin ioh rynsan ha katei ka Cherry Blossom ka ban sa long ha Ri Bhoi kumba la thmu ban pynlong da ka sorkar jylla.
