U Symbut myntri ka sokar jylla bad uba dei ruh u Transport Minister, u Bah Sniawbhalang Dhar mynta ka sngi u la hair sha Umroi Airprot ban ia kynduh lang bad ki bor ba dei peit ka Airport Authority of India na ka bynta ka jingthmu ban pynheh ia katei ka Kad Lingsuin kaba don ha Umroi ha Ri Bhoi District.
Ha kane ka jinghiar utei u myntri sorkar la pynlong shuwa ia ka jingiakynduh lang ha Conference Hall ka Umroi Airport ha kaba la sakhi lang da ka jingdon lang u MLA ka Umroi, u Bah Damanbait Lamare, u Chief Secretary ka sorkar u Bah D.P Wahlang, u Deputy Commissioner ka Ri Bhoi, u Abhilash Baranwal bad ruh la don ryngkat u Regional Executive Director ka AAI, M. Raja Kishore, Director ka Umroi Airport bad kyntup ruh ki ophisar na ka sorkar jylla bad na ka Airport Authority of India.
Hadien ka jingialang la leit jurip ruh ia katei ka Airport, kaba long shi bynta ban pynkhreh na ka bynta ban pynheh noh ia kane ka Kad Lingsuin ka jylla.
Haba kren sha ki lad pathai khubor, u Bah Sniawbhalang Dhar kum u Symbut Myntri ka sorkar jylla bad uba peit ruh ia ka tnad Transport, u la ong ba ka jingthmu jong kane ka jingiakynduh lang bad ki bor ba dei peit na ka Airport Authority of India ka dei ka jingthmu ba ka sorkar jylla ka angnud ban pynheh noh ia kane ka Kad Lingsuin ha ka jylla.
U la ong ruh kumba long haduh mynta ban pynheh ia kane ka Airport dang donkam ban shim jaka sa 16 akar, 6 akar na ka bynta ka parking Bay bad ruh la kumno kumno ka jinglut ha kaba pynheh ia kane ka Kad Lingsuin kan poi sha ka T. 500 klur.
U la iathuh ruh ki don shibun kiei kiei kiba ka sorkar jylla lada ka pynheh ia kane ka kad lingsuin ka hap ban ioh jingbit na ka sorkar kmie bad dei tang lada ka sorkar kmie ka la ai jingbit ki lah ban pyniaid shaphrang ban pynheh noh ia kane ka Kad Lingsuin.
U la ong ruh ba kas sorkar jylla ka angnud bha ban pynheh noh ia kane ka Kad Lingsuin ka jylla kaba don ha Umroi bad na ka bynta ki jingiakren ba mynta ka sngi un sa rah noh mardor sha ka jingialang ka kynhun ki myntri sorkar (Cabinet Meeting), khnang ba ka sorkar kan ai jingthoh noh kham kloi sha ka sorkar kmie halro ki lad ki lynti kiba kan shim na ka bynta ban pynheh noh ia kane ka Kad Lingsuin.
Shuh shuh, ha kane ka sngi,u la bynrap ruh da kaba ong, ba ka jingthmu kane ka jingpynheh ia kne ka Kad Lingsuin ka long ban pynsuk ia ki paidbah ha ka jylla ha ka leit ka wan sha kiwei ki jylla bad ha kajuh ka por ruh kan long kum ka jingaikam ai jam ia ki samla, ha kaba lada lah ban pyntreikam noh 24 kynta bad lada don ki Lingsuin kiba heh kan iarap ruh ia ki khun samla ka jylla kum kata ka lad ioh kam ioh jam.
