Ka Seng HNYF Sengkmie mynta ka sngi ka la pynbna paidbah ba ka la dep ba beh seng noh ia u Bah Marcus Marten, uba dei u Vice president ka sengkmie bad ruh u dkhot ka HNYF halor ki Nongrim ba u ialeh pyrshah ia ki riti treikam ka seng.
Ia kane la pynbna da u General Secretary ka HNYF Northern Region, u Bah Alfred Mallai haba kren sha ki lad pathai khubor mynta ka janmiet ha Nongpoh.
Haba kren sha ki lad pathai khubor, u Bah Alfred Mallai u la ong ba ia kane ka jingpynbna ba la beh seng noh ia u Bah Marcus Marten na ka seng HNYF, ka dei ka jingaibor da ka seng kmie bad ruh ba la shim ia ka rai ha ka jingialang kaba la long ha ka 21 tarik u Nailur 2024 ha Shillong.
U la ong ruh na ka liang ka seng ka pynbna paidbah ruh ba naduh mynta u Bah Marcus um don bynta ei ei shuh ha ka seng HNYF bad un nym lah shuh ban long u dkhot ka HNYF. Lada don kino kino ki paidbah kiba don jingiadei halor ki kam seng ki dei ban pyntip noh sha ki nongialam ka seng bad ym shuh ha u Bah Marcus Marten ba ka seng ka la beh seng bad la pynbna ba um dei shuh u dkhot ka seng HNYF la ka long ha ka seng kmie ne ha ka Northern Region.
Shuh shuh, u la pyntip ruh ba ka seng HNYF Northern Region ka la ioh ia ki nongialam ba thymmai ha Ri Bhoi District bad ka ai khublei ruh ia baroh kito kiba la ia kyrshan bad ai mynsiem ha ka jingialang pynskhem ia ki nongialam ha ka 14 tarik u Nailur 2024 kaba la long ha Umsning.
