Ka Dr. Mazel Ampareen Lyngdoh, ka Myntri ba dei khmieh ia ka tnad ka Koit ka Khiah ha ka jylla Meghalaya, ka la kyntait beit war ia ka jingkynnoh ba la don ka jingleh sting da ki bor ka tnad Civil Hospital Nongpoh ban ai jingsumar ia kawei ka longkmie kaba armet kaba mad ia ka jingjia hap khyllung ha ka miet jong ka 21 tarik Nailur.
Lah ban kdew, ba kawei ka longkmie ba la tip kyrteng kum ka Kong Monaliza Langi na Umden Diwon ka la mad ia ka jingjia kaba sngewsih hadien ba ka la kha ia i khyllung ha ka jaka leit bar ha Civil Hospital Nongpoh bad i ne i khyllung I la khlad noh hashen.
Katkum ka jingpynshai da ka Myntri ka tnad ka Koit ka Khiah, ka Dr. Ampareen Lyngdoh ka la ong ba mar ia ioh jingtip halor kane ka jingjia, ka la bthah ia ki bor ba dei peit lyngba u ophisar Joint Director ban tohkit halor kane ka jingjia bad ruh ban pynpoi ia ka kaiphod ba pura ha ka miej jong ka.
Ha kane ka kaiphod ba la iohlum, la iathuh, ba kane ka longkmie kaba la mad ia ka jingjia ba sngewsih ka dei ka longkmie kaba dang pun ia i khyllung ba dang hapoh 5 bnai eiei, kumta na Umden PHC ki la pynkynriah sha Nongpoh Civil Hospital bad la khmieh bniah ia kane ka longkmie da ki doctor kynthup ia ka doctor Gynecologist.
La ioh jingtip, ba kane ka longkmie kaba la leit shabar, ha ka jingsynranlang ruh da u kurim ka la mad ia kane ka jingjia ba sngewsih ha kaba i ne khyllung I la hap noh ha katei jaka leit bar (Spontaneous Abortion) bad na ka liang ka tnad ka Koit ka Khiah ka phah ia ka khubor Sngewlem sha kane ka longiing kaba la mad ia kane ka jingjia ba sngewsih.
Ha kaba ia dei pat bad ka jingbym ai ambulance na Umden PHC, na ka liang ka Myntri kan nang ap shwa ia ka kaiphod ban tip ia ka jingshisha, ka la bynrap.
