Da ka jingsngewdiaw kaba khraw halor ka jingbym treikam pura ka Pharmacist Council ha ka jylla Meghalaya, kaba la buh jingeh ruh ia ki samla ban iohkam iohjam wat hadien ba la pyndep ia ki jingpule, na ka liang ki samla pule Pharmacist mynta ka sngi ki la leit buh syndon da ka dorkhas ha ka Dr. Mazel Ampareen Lyngdoh ka Myntri ba dei peit ia ka tnad ka Koit ka Khiah ka jylla Meghalaya.
Haba kren bad ki Nongthoh Khubor hadien ka jingiakynduh ia ka Myntri, u samla Emos John Syiemlieh, u la pynpaw ba ka kynhun ki samla kiba la pyndep ia ka kyrdan Pharmacy ki don hapdeng ka jingum dum namar ka jingbym iohkam iohjam hapoh ka jylla Meghalaya kaba dei tang namar ka jingbym treihok da ka Pharmacist Council kaba la don lypa naduh u snem 1992.
La pynpaw ruh, ba ka jingbym treikam jong kane ka Council ka kynthup ruh naduh ka jingbym pynthymmai ia ki nongkitkam jong ka.
“Ka Pharmacist Council ka dei kaba don ka bynta ban bishar iaki dawai, naduh ka jingshna haduh ka jingdie bad ka jingdih iaki jait dawai” la ong u samla Emos.
Na ka liang ki samla pule kiba la pyndep ia ka jingpule pharmacy kin sa thaw noh da ka Association kaba thymmai na ka bynta ban peit ia ka bha ka miat ki samla kiba la pyndep ia ka jingpule bad ruh na ka liang kane ka kynhun ka la dep ban pynsngew ruh ha ka Myntri ban pynrung kam ia ki kum kj Pharmacist ha ki CHC, PHC bad haka juh ka por ban thaw daka Pharmaceutical Industry hapoh ka Jylla.
