Ka tnat ka koit ka khiah ka Sorkar Jylla kan thaw daka Committee ban khmih da u Commissioner Secretary ban peit iaka jingdawa ki samla pule Pharmacist jong ka Jylla.
Ïa kane ka pyntip daka Myntri ka tnat ka koit ka khiah ka Kong Ampareen Lyngdoh.
Haba kren sha ki lad pathai khubor ka Kong Ampareen kala ong “Iaka Committee yn khmih da u Commissioner Secretary ka tnat ka koit ka khiah u Joram Beda bad kane ka Committee kan bishar iaki jingdawa ki samla pule Pharmacist khamtam haba iadei bad ka jingbym shah thungkam katkum ka jingdonkam”.
Ka Kong Ampareen kala iathuh ba ki samla pule Pharmacist kila pynpaw haduh mynta ka Service Rules kam pat don bad kane ka lah ban dei kawei na ki daw bah ba kam don ka jingshah thungkam iaki katkum ki kyndon ka IPH.
“Nga mynjur iaki jingpynsngew ba kila wanrah hakhmat jong nga khamtam haba iadei bad ka jingduna ki Drug Inspector hapoh ka Jylla. Nga la kular haki ban wad bniah halor kane” la ong ka Kong Ampareen.
Ka Kong Ampareen kala ong ruh ba kala bthah iaki Ophisar ka tnat ban wad jingtip haba iadei bad ka Council kaba khmih iaki Pharmacist jong ka Jylla kaba la don naduh ki snem 1981 lane 1991.
“Nga la ioh ïakren bad ki samla Pharmacist, ngi donkam ban pynshisha iaki jingpynsngew jong ki bad hadien kata ngan rah ban ïakren bad u Myntri Rangbah ka Jylla” kala ong.
