Wat ka National People’s Party (NPP) haba ka kwah ban pynlong Rally, ka hap ban shim jingbit naki Deputy Commissioner (DC), namar kata ka kiba thmu ban pynlong Rally ialap pyrshah bam Doh Masi ruh ki hap ban pan jingbit naka Ophis DC.
Ia kane la ong u Myntri Rangbah ka Jylla u Conrad K Sangma haba kylli, hato ka Sorkar kan ai jingbit ne em iaka kynhun Jagadguru Shankaracharya Avimukteshwaranand Maharaj of Jyotirmath ban pynlong Raly haka 2 tarik Risaw ha Shillong.
Haba jubab ia kane, ka rai ba khadtuh ka shong haki DC ban ai ne em ka jingbit ban pynlong Rally hadien ka jingbishar bniah iaka jinglong jingman.
“Haba kwah ban pynlong Rally, ngi hap ban Apply daka ba thoh sha ka ophis DC bad hateng ka ophis DC kam ju ai” la ong u Conrad.
Haba ban jur iaka jinglong laitluid ka Ri india, u Conrad u la ong “Kam don satia kano kano ka jingmushlia jong ka Sorkar la kadei haka rukom bam, ka rukom lehniam, ne ban ngeit ha kano kano ka jait niam”.
