Ka Kynhun ki Myntri Sorkar Jylla, mynta ka sngi hadien ka jingshong ia mir jingmut kaba sani bha, la pynpaw ban ai ia ka jingmynjur halor ka jingthmu thied jaka ban pynheh ia ki ar tylli ki kad liengsuin ha ka jylla kata ka Shillong Airport bad ka Baljek Airport.
La pyntip ruh, ia kane da u Myntri Rangbah ka jylla u Conrad K Sangma, hadien ka jingialang, ha kaba la shim ia kane ka rai hadien ba la pynshong nongrim halor ka kaiphod sorjamin kaba dang shu dep ha kine ki ar tylli ki kad liengsuin kaba la batai ba ki liengsuin kiba kham heh ki lah ban hiar ban ai jingshakri ia ki paidbah nongleit nongwan.
U Myntri Rangbah ka jylla, u la iathuh ruh, ba shen kan sa don sa ka jingpan jingbit na ki bor ka Directorate General of Civil Aviation (DGCA) ban pyniaid ia ki kam halor ka jingpynheh ia kine ki kad liengsuin kiba kynthup naduh ka jingthied ia ki jaka, ka jingdonkam ban pom ia ki lum bad kiwei kiwei na bynta ka Shillong Airport katba na bynta ka Baljek Airport ki kam ki nang iaid shakhmat.
“Na ka liang ka sorkar jylla Meghalaya kan hap ban pynmang ia ka jinglut kumba T. 100 klur na bynta ka jingpynheh ia ka jaka iaid ki liengsuin (Runways) kaban don kumba 571 meter, katba kiwei kiwei ki jinglut kaban kot kumba 500 klur tyngka yn bei hi da ki bor ka Airport Authority of India (AAI)”, kdew u Conrad K Sangma.
U la iathuh ruh, ba ka sorkar jylla ka don ia ka jingkyrmen ba lyngba ka jinglah ban pynheh ia kine ki kad liengsuin ba kongsan ka jylla Meghalaya ki liengsuin kiba heh kumba ka A320 bad ka Buoying373 kiba kit kumba 170 haduh 180 ngut ki nongleit nongwan kin lah ban hiar ha kine ki kad liengsuin jong ka Shillong bad Baljek Airport.
Kumta, lah ban sngewthuh ba kine ki project ki dei kiba kongsan bad kiba kordor ia ka jylla Meghalaya hi baroh kawei, ba kum ki nongshong shnong ki donkam ban ai ka jingiatreilang ban kyrshan ban pynjop ia kane ka jingthmu namar ka jingmyntoi kan long ruh ym tang ha ka ioh kam iohjam, hynrei kan kyntiew ia ka ioh ka kot naduh ka kam jngohkai pyrthei bad kiwei kiwei hapoh kane ka jylla, bynrap u Myntri Rangbah ka jylla.
