Shillong, Jylliew 3: Haduh 27 ngut ki nos na ka jylla Meghalaya ki la ioh ban leit trei shabar jongka ri India, lyngba ka jingtrei shitom bad minot jong ki hadien ba ki la dep ban iakhun exam bad ioh ka jinghikai ban tip ia ka ktien tynrai jong ka ri Japan bad Singapore.
Kumta da ka jingioh ia kane ka lad thymmai kaba thymmai ba la shimkhia kyrpang da ka Sorkar Jylla Meghalaya, bun ki nos na ka jylla ki la ioh ban pynkhreh ban leit trei sha kylleng ki jaka ai jingsumar kiba don haka ri Japan bad Singapore.
Na ka liang ka sorkar Meghalaya, ka la pynmih ia kawei ka prokram ba la tip kum ka ‘Skill Meghalaya Scheme’ da kaba ai ruh ia ka baibam kaba T. 50,000/- lyngba ka Meghalaya State Skill Development Society (MSSDS).
Hadien ba katto katne ngut ki nos kiba la leit trei mynta sha Japan, na ka liang u Myntri Rangbah ka jylla u Conrad K. Sangma u la shimkhia ruh ban leit jurip dalade sha Japan ban kynduh ia ki nonghikai bad ha ki jaka ai jingsumar ba la don ki nos jong ka jylla Meghalaya kiba la sdang ban trei ha katei ka ri.
U Conrad K Sangma, u la pynpaw ia ka jingkmen jingsarong da kaba ong, “Ka long ka burom kaba khraw na bynta jylla Meghalaya ban iohi ia ki nos ki la mih ban ai jingshakri sha ki ri bapher bapher jong ka pyrthei, ha kaba ka sorkar jylla ka la ioh ban phah ia ki nos ha ryngkat ka jingkyrkhu kyrdoh bad u la kyntu ruh ia kiwei kiwei ki nos ruh ba kin wan shakhmat ban shim ia kane kabu ksiar.
Kumba 27 ngut ki nos ki la dep ban register bad ka Kompani Navis ban ioh ia ka jinghikai ban nang ha ka ktien ka thylliej Japanese hapoh ka Bengaluru. Na kitei ki 25 ngut kiba lah pyndep ia ka eksamin ba nyngkong bad pass, la ioh jing tip ba 5 ngut ki la ioh ia ka Visa, 2 ngut ki la dep ban leit sha Japan ha ka 27 tarik u Jymmang 2024 bad kiwei ki dang ap ia ki Visa.
Ki la don ruh 14 ngut ki nos kiba la iohkam ban trei sha kiwei pat ki jaka ai jingsumar bapher bapher jong ka ri Singapore.
