U Member ka Parliament (MP) sha Rajya Sabha u Dr WR Kharlukhi u la thoh sha u Myntri Rangbah ka Jylla u Conrad K Sangma ban thung daka kynhun tohkit ba laitluid halor ka jingkynnoh jyrsieh thungkam daka Meghalaya Public Commission Service (MPSC).
Ia kane u Dr Kharlukhi u la dawa namar ba ka kurim jong u ka Kong Corina Lyngdoh ka dei kawei napdeng ki dkhot jong ka MPSC.
Haba kren sha ki lad pathai khubor u Dr Kharlukhi u la ong ba ka jingdawa ban thung daka kynhun tohkit ba laitluid ka dei namar kane ka jingshah kynnoh jyrsieh ha MPSC kala pynjah burom iaka iing ka sem.
“Nga la thoh bad nga la kynduh ïa u Myntri Rangbah ka Jylla ban dawa thung daka kynhun tohkit ba laitluid halor ka MPSC bad lada ka jingtohkit ka kdew ba ka kurim jong nga ka donkti ha ka jyrsieh thungkam, kadei ban shah pynshitom bad nga ruh ngan hiar shuki noh kum u MP” la ong u Dr Kharlukhi.
U Dr Kharlukhi u la ong ba watla ki nongkynthoh ki khlem kynnoh shimet pyrshah iaka kurim hynrei kila shu kynnoh kyllum lang ba don ka jyrsieh ha MPSC bad dei kata namar u kwah ban don ka jingtohkit ban khuid ka kyrteng jong ka kurim bad ka iing ka sem.
