U Chief Executive Member (CEM) ka Khasi Hills Autonomous District Council (KHADC), u Bah Pyniaid Sing Syiem, u la iathuh, ba ka District Council ka don ia ka jingkyrmen kaba skhem ba shen u Lat ka Jylla u CH Vijayshankar un ai noh ia ka jingmynjur ia ki 7 tylli ki bills ba la phah da ka District Council naduh u snem 2023.
Ia kane la pyntip da u Bah Pyniaid Sing Syiem, hadien ka jingleit ia kynduh jong ki nongpyniaid ka district council ia u Lat ka Jylla ha Raj Bhavan, ha kaba la synranlang ruh da u Dy.CEM Pynshngainlang Syiem, ki EM bad kiwei.
U CEM u la pynpaw, ba ha kane ka jingiakynduh ia u Lat, na ka liang u Vijayshankar u la pynpaw ia ka jingsngewhun halor ka jingpynkhreh ia kine ki 7 tylli ki bills da ka KHADC, ha kaba shen yn sa lah ban ai ia ka jingmynjur ia ki, nalor kine ki 7 tylli ki bills kiba kham kongsan kumba la kdew, ka long ka jingpyntreikam noh ia 2 tylli ki bills kiba kynthup Khasi Hills Autonomous District Administration of Elaka Amendment Bill, 2023 kaba long ka jingithuh ne ka jingpynkup bor lyngba ka aiñ ia ka jingtreikam ki seng Samla bad Seng Longkmie ha ki Shnong.
Nalor kane, sa kawei pat ka bill kaba sngewthuh kaba long kaba donkam eh ka long ka Khasi Hills Autonomous District Khasi Social Custom of Lineage Amendment Bill 2023 kaban ithuh ia ka rukom treikam bad ka jinglong jingman jong ki Seng Kur bapher bapher kiba don ym duna ia ka 3000 tylli kita ki Seng Kur hapoh ka jylla bad lyngba kane ka bill yn lah ban pynkup bor pat lyngba ka aiñ ia ka jingithuh ia u Rangbah Kur jong kita ki Kur ba la ithuh da ka District Council.
U Bah Syiem u la kdew ruh, ba kiwei pat ki bills kiba la phah da ka District Council ban ioh ia ka jingmynjur na u Lat ki kynthup ia ka Khasi Hills Autonomous District Regulation and Administration of Land) Rules, 2023, ka Khasi Hills Autonomous District Regulation and Administration of Land Amendment Bill, 2024, ka Khasi Hills Autonomous District Fisheries Amendment Bill, 2023, Regulation of Trading by Non-Tribal Amendment Rules, 2023, Khasi Hills Autonomous District Autonomous Districts Nomination and Election of Lyngdoh and Myntri, Lyngdoh Raid and Sordar Shnong Administration of Sohiong Lyngdohship 2023.
