Hadien ba la ioh jingtip ba ka kynhun ki Hindu ba la tip kum ka ‘Gau Bharat Yatra’ kin sa wan poi mynta ka sngi ha Nongbah Shillong, ha kaba kin wan poi shiteng sngi ha Kad Lingsuin Umroi, ki nongialam ka KSU bad HYC mynta ka sngi ki la hiar sha katei ka kad Lingsuin ban pyrshah halor kane ka jingthmu wan katei ka kynhun na ka bynta ban pynlong ia kata ka rally ban pyrshah bam don masi hapoh ka jylla Meghalaya.
Kane ka jingmih kine ki kynhun nongialam seng bhalang ba kynthup ia ka Khasi Students Union bad ka Hynniewtrep Youth Council ban hiar sha Kad Lingsuin ha Umroi, ka long ban pyrshah halor ka jingthmu katei ka kynhun ban pynlong ia katei ka Rally ba la buh ha ka 2 tarik u Nailur 2024 ha Nongbah Shillong.
La iohi ruh ba ki nongialam bad ki dkhot kitei ki ar tylli ki seng ki la poi ha Kad Lingsuin mynta ka step, ha kaba ki la ia ap ha katei ka jaka kumba ki la ioh jingtip ba kitei ki kynhun kin wan poi mynta ka sngi ha ka por shiteng sngi ha Kad Lingsuin Umroi bad ban leit pat sha Nongbah Shillong.
La sakhi ruh hadien ba la wan poi ki kynhun seng bhalang, ka sorkar ka la phah ban pahara da ki bor pulit bad ki bor CRPF ha katei ka Kad Lingsuin ha Umroi, kaba long shi bynta ban nym mih kano kano ka huri hura ne kaba ktah ia ka shongsuk shongsain ki paidbah.
Haduh ba la thoh ia kane ka khubor, ki kynhun seng bhalang ki dang ialum ha Kad Lingsuin Umroi ban ia ap ia katei ka por ban wan poi kitei ki kynhun bad kaktum ka jingioh lum jingtip da u Meghalayapost.news la pyntip ba kitei ki kynhun kin wan poi lashai ka sngi ha ka por shiteng sngi ha Kad Lingsuin Umroi.
