Ka jylla Meghalaya hapoh ka jingialam khmat da u Conrad K Sangma kum u Myntri Rangbah ka jylla, ha ka jingiashimbynta ha ka 16th Finance Commission ka la snohkti lang bad kiwei pat ki 7 tylli ki jylla ban dawa kyntiew ia ka mang khajna na ka sorkar pdeng ka Ri India, pyntip u Chairman ka 16 Finance Commission u Arvind Panagariya hadien ka jingialang kaba la long mynta ka sngi ha nongbah Shillong.
Haba ia kren bad ki Nongthoh Khubor, u Chairman ka 16 Finance Commission, u la iathuh ruh, ba kumba ju long baroh shikatta, baroh ki jylla ki ioh ia kata ka bhah khajna na ka sorkar pdeng kaba long kumba 41%, hynrei ha kane ka Commission kaba dang shu dep shen, ka jylla Meghalaya nalor kiwei pat ki la dawa lyngba ka dorkhas ban kyntiew ia ka khajna sha ka 50% katkum ka Divisible Pool.
U la pyntip ruh, ba halor kane ka jingdawa jong ka jylla Meghalaya, na ka liang u Myntri Rangbah ka jylla u Conrad K Sangma u la dep buh ia ka jingtyrwa ba la kot haduh T.1.2lak klur ia kaba la angnud lyngba ka ka Grants-in-Aid na ka bynta san snem, ia kaba ka Commission kan sa shong pyrkhat bha hashwa ban ai ia kano kano ka rai da kaba iathir sani halor kine ki jingdawa.
“Kan shong ha ki bor ka sorkar pdeng ban bishar bniah ia kane ka jingdawa namar baroh shikatta, katkum ka Grant in-aid ka wan na ka consolidated fund jong ka Sorkar Pdeng bad ha ka 14th Commission ruh la dep ban kyntiew ia ka jingsam khajna”, ong u Arvind Panagariya, da kaba bynrap ba ka Commission ka ihun bha ia ka jingbatai da u Myntri Rangbah kaba la biang pura ia ka jingdonkam kaba la kdup lut ia ki prokram jong ka roi ka par ka jylla Meghalaya hi baroh kawei nalor ka jingbuhthong ban kynjoh ia ka GDP ba 10 billion dollars hapoh u 2028.
