Ki shipai iada khappud Border Security Force (BSF) haka 30 tarik mynta u bnai, kila kem ia 4 ngut ki nong India bad kurup ia 4 tylli ki kali ba kit ia ki marbam naka thain khappud ka East Khasi Hills.
Ka kyrwoh naki shipai BSF, ka kdew ba ha ka 30 tarik Nailur, ki shipai kila ioh ia ka jingtip ba ia ka jingdon ki kali kiba kit shini, kiba iaid sha thain Shella lyngba ka surok Ichamati bad naka liang ki shipai ka BSF 110 Battalion kila bat ia 4 tylli ki kali.
Ka kyrwoh ka kdew ba hadien ka jingtalasi la lap ba 3 tylli ki kali ki dei kiba kit shini bad kawei ka dei kaba kit rynsun ba shongdor haduh T.10 lak.
La iathuh ba ha ka jingtohkit, ki nongniah jong kine ki kali kim shym la lah satia ban pyni ia ki kot ki sla bala ioh jingbit ban kit ia kane ka shini bad u rynsun.
Haba iadei bad kane, ki BSF kila aiti noh iaki kali, ki mar bad iaki 4 ngut sha ka Land & Custom Office kaba don ha Bholaganj.
