Ban pyntyllun ia ki kam shakri ha kaba phai khhmat kyrpang ban kyntiew ia ki kam jngohkai pyrthei, ka Eastern Ri Bhoi Tourism & Environment Development (ERTED) ha ka 2 tarik u Risaw 2024, ka la lah ban plie da ka ophis treikam ba pura ban pyniaid ia ki kam jong ka seng ha ka Shnong Khapmara, Lumdaitkhla Bhoirymbong ha Ri Bhoi District.
Ia kane ka ophis treikam katei ka seng la wan ban plie paidbah da u Rangbah Shnong ka Shnong Lumdaitkhla Bhoirymbong u Bah S.T Rympei kum u kongsan bad u Bah R. Rymbai, Secretary Shnong kum u symbut kongsan. La sakhi lang ruh ha kane ka sngi da k ajingdon lang u Bah Alos Nongpoh Chairman, u Bah Lamphrang Rympei General Secretary, u Babu Longsing Bey Chief Adviser bad kiwei kiwei ki nongialam katei ka seng.
Haba ai jingkren kum u kongsan, U Bah S.T.Rympei u la ai ka jingkhublei kaba kyrpang ia ka ERTED ia ka jingpyrshang ka jong ka ha ka ban kyntiew ia ki kam jngoh kai pyrthei hapoh jong ka Eastern Ri Bhoi, kumjuh ruh ka jingpyrshang jong ka ban pynneh ia ka Mei Mariang.
U la ong ba ka jingplie jong ka ERTED ia ka ophis treikam ba pura jong ka ha kane ka sngi ka pynpaw ia ka jingtrei shitom bad jingminot jongka wat haba ka long ka kynhun kaba dang thymmai, bad lyngba kane ka ophis kan wan rah jingmyntoi shibun ha kaba ia dei bad ki paidbah ka Eastern RiBhoi ka ba lah ruh ban wanrah ia ki lad kamai ja kpoh.
Shuh shuh, u Bah S T Rympei u la pynkynmaw ruh ba kum ki paid nongshong shnong jong ka Eastern Ri Bhoi ngi long kiba la ioh ia ka jingkyrkhu kaba kyrpang lyngba ka jingdon jong ka Umroi Airport bad kadei ia ngi ban pyndonkam hok ia kane ka jingkyrkhu.
