Ka Khasi Students Union (KSU) ka la ban khia ba ha ka State Reservation Policy kaba thymmai, ka jingbhah kam bhah jam ka dei ban long 50 percent na ka bynta ki Khasi-Jaintia, 40 percent na ka bynta ki Garos, 5 percent na ka bynta kiwei ki Scheduled Tribes bad 5 percent na ka bynta ka General (unreserved category).
Ka KSU ka la pynpaw halor kane ka jingai jingmut, ka dei hadien ba mynta ka sngi ka la aiti ia kitei ki jingai jingmut sha ka Expert Committee, ha kaba ia dei bad ka jingbhah kam bhah jam halor ka State Reservation Policy, kaba dei ruh ha Public Hearing b alai sngi kaba la long ha Nongbah Shillong.
Kumba la pynpaw da u General Secretary ka KSU Sengkmie u Bah Donald V. Thabah, ha ka jingai jingmut sha ka Expert Committee, ka seng ka la ai jingmut ha kaba lada khein ia ka jingbhah kam katkum ka jingbun paid hapdeng u Khasi bad Garo, ka seng ka ai jingmut ba dei ban ai ia ka bhah kaba 50% ia ki Khasi-Jaintia bad 40% na ka bynta ki Garos, 5% na ka b yhnta kiwei ki ST bad 5% na ka bynta ka General (Unreserved), pynpaw u Bah Thabah kum u nongialam ka KSU.
U la iathuh ruh ba sa kawei pat ka jingai jingmut ka seng ba lada katei kaba la ai jingmut kam lah ban long, ka dei pat ban long 90% na ka bynta ki Khasi-Jaintia bad Garo, 5% na ka bynta kiwei ki Scheduled Tribes bad 5% na ka bynta ki Unreserved. Kine ki dei ki jingai jingmut ka seng sha ka expert committee, u la ong.
U la ong ruh ba ka seng KSU ka la ai jingmut ruh, “ Ba lada yn pyntreikam noh ia ka Reservation Policy ba thymmai bad kam pat ban phai dien sha ki snem ba la leit noh (Retrospective) bad ka dei ban khein thymmai naduh ba la pyntreikam ia kane ka Reservation Policy ba thymmai (Prospective).
“Ka KSU ka la ai jingmut ruh ba dei ban bhah kam 100% ka jingbhah kam ia ki Nonghikai Lower Primary bad Primary School” ong u Bah Thabah.
Shuh shuh, u Bah Donad Thabah u la ong ruh ba ka seng ka la ai jingmut na ka bynta ka rilum Garo, dei ban bhah kam 100% na ka bynta ki nonghikai bad ha rilum Khasi-Jaintia ruh dei ban bhah kam 100%, namar ka seng ka sngewthuh ba yn nym lah ban pyntreikam katkum ka bhah 40:40 or 50:40, bad ruh ba ki Garo kin nym lah ban hikai ia ki khynnah Khasi ha ka ktien Khasi bad ruh ki Khasi kin nym lah ban hikai ia ki khynnah skul Garo ha ka ktien Garo.
