Ha kawei ka jingjia kaba sngewsih, u wei u rangbah briew u la duh ei ia la ka jingim ha ka jingjia tyngkhuh kali kaba la jia hynne ka step jong ka 3 Tarik Risaw ha ka shnong Ïalong, West Jaiñtia Hills District.
Kumba la ioh khubor, la iathuh, ba ka jingjia tyngkhuh kali kaba shyrkhei ka la jia hajan ka Civil Hospital Ïalong, ha kaba kawei ka kali Maruti 800 kaba don ia u number ML 05 G 8164 ka la tyngkhuh markhmat bad kawei ka trok kaba don ia u number AS 01 LC 5864 bad ha kane ka jingjia u nongñiah jong katei ka Maruti 800 u la khlad noh hashen.
La ioh jingtip, ba u nongniah ba la khlad noh la tip kyrteng kum u Maccimilan Suchiang na ka shnong Shangpung katba u nongniah jong ka trok ba tip kyrteng kum u Anil Warjlem na Mawrynkneng u la leit aiti noh ialade sha ki bor pulit, ki pulit ki dang pynlong ia ka jingtohkit halor kane ka jingjia.
