Hadien ki samla jong ka shnong Mawsmai ki la shah bom shah shoh ha ka kynhun Syndicate ka Assam kiba buh khyrdop ha Jorobat ha ka miet jong ka 2 tarik u Risaw 2024 ha Jorobat, ka Shnong Mawsmai mynta ka sngi ka la lum kyrkieh da ka jingialang ha Jorobat hajan katei ka Gate ki Syndicate na Assam na ka bynta ban pynpaw ia ka jingpyshah halor ka jingshah shoh ki samla ha katei ka kynhun na Assam.
Kumba la pyntip, ha katei ka miet ki samla na ka thain Meghalaya ba hap ha ka Shnong Mawsmai ki la shah bom shah shoh ha ka kynhun Syndicate na Assam, da kaba ki la bom da u bilor kyiad bad uwei na u samla ruh u la mynsaw na ki bynta jong ka kpoh. Kane kam dei ka sien kaba nyngkong na ka por sha ka por ka don ka jingjia ba sngewsih kaba pyntieng pynsyier ia ki paidbah nongshong shnong ha ka leit ka wan.
La ong ruh ba katei ka kynhun Syndicate ka Assam ki ju shong ha Jorobat ban buh ia ka khyrdop khong pisa ha kaba la ju don ruh ki Pulit ka Assam kiba pahara ha katei ka jaka, hynrei kaei kaba sngewsih kane ka la wan rah pynbah ka jingtieng jingsyier ia ki paidbah ba kitei ki kynhun Syndicate ka Assam ki ju leh donbor kumba ki la bom la shoh ia utei u samla da kaba ki la sei ruh na ka Kali ha ka por ba ki thmu ban leit sha la ing.
Halor kane ka jingjia, na ka laing ka Shnong Mawsmai lyngba u Rangbah Shnong u Bah Petrus Shakhwa bad la synran lang ruh naduh ki Longkmie ki longkpa bad la synran lang ruh da ka FKJGP Byrnihat Circle ki la pyntip ba ki la phah noh da ka jingthoh sha u Deputy Commissioner ka Ri Bhoi na ka bynta ban phah weng ia katei ka khyrdop ba la buh da ka Syndicate ka Assam.
