Ki san tylli ki longing ha ka shnong Nongspung B ba hap ha Umling C&RD Block ki la hap ban kylla langknia haduh ba julor ki ing ki sem bad ki jingthung jingtep, kaba dei tang na ka daw ka jingtih khyndew na uwei u lum ha katei ka shnong da uwei u briew ba la tip kyrteng kum u Donald Srinate, uba dei na ka jaid bynriew Naga.
Kane ka jingtih khyndew na uwei u lum ha katei ka shnong ki san tylli ki longing ki la hap ban mad ia ka jingshlei um bad ka jingshah pynjot ki ing ki sem bad ki jingthung ki jingtep, namar ha kane ka por slap ka khyndew bad u shyiap ki tuid sha katei ka shnong ban pynjulor ia ki ing bad ruh ki jingthung jingtep.
Kitei ki san tylli ki longing kiba shah ktah ki kynthup ia ka longïing jong ka Premika Sungoh, Lijanta Sungoh, Kerning Sungoh, Manar Suting bad ka ing jong ka Kong Wompher Dhar.
Kumba la iathuh da kitei ki longing ba shah ktah bad ruh u Rangbah shnong u Bah Phelimon Tongper, la ong ba ha ka jingshisha la dep ban ujor sha ka Pilingkata Police Outpost halor kane ka jingshah ktah ki longing na katei ka jingtih khyndew, hynrei kumba long haduh mynta kam don kano kano ka jingsiew ia kitei ki longing ba la shah ktah.
Ki la iathuh ruh ba utei u briew ba tih khyndew na utei u lum u la shu kular tang ban pynkhuid ia kitei ki khyndew bad ki shyiap ba tuid sha katei ka shnong, hynrei u klem siew ei ei pat halor ka jingshah pynjulor ki ing ki sem bad ki jingthung jingtep.
Halor kane ka jingshah ktah ki la kyrpad ia ka bor sorkar ba dei peit halor kane ka kam khamtam ka tnad Forest ba kan tuklar lem bad ban leh katkum ki kyndon jong ka ain, namar katei ka jingtih khyndew ka la pynjot shisha ia ki ing ki sem bad ki jingthung jingtep ba ka khyndew bad ki shyiap ki tuid lut sha katei ka shnong tang shu wan u lapbah.
