Haba pynkut noh ia ka Public Hearing mynta ka sngi halor ka State Reservation Policy ba la pynlong ha Nongbah Shillong naduh ka 3 tarik u Risaw haduh ka 5 tarik u Risaw 2024, u MLA ka Nongpoh Constituency u Bah Mayral Born Syiem kum u nongmihkhmat na Ri Bhoi u la ai jingmut sha ka Expert Committee ba ka jingbhah kam ha katei ka Reservation Policy ka dei ban long beit 80% na ka bynta ki Khasi-Jaintia bad Garo la ka dei ha ka MPSC ne ha ka DSC.
Haba kren sha ki lad pathai khubor hadien ka jingai jingmut sha ka Expert Committee ka State Reservation Policy, u MLA ka Nongpoh u Bah Mayral Born Syiem, u la ong ba na ka liang jong u kum u MLA na Ri Bhoi u la dep ban ai jingmut ba ka jingbhah kam ha ka MPSC bad wat ha DSC ka dei beit ban long 80% na ka byta ki Khasi Jaintia bad Garo.
Haba kren shaphang ka District, u la pynshai halor ka jingai jingmut ba ka dei ban long 80% ka jingbhah kam ka dei ban long beit tang ia ki trai District la ka long ha kano kano ka District jong ka jylla.
U la ong ruh wat ha ka UPSC ka la don ka jingbhah kam na ka bynta ki jaid bynriew ba dan sahdien kaba long 7.5% kumba la pynkup bor da ka riti synshar ka ri bad kane ka jingmut ka Reservation Policy ngi dei ban tip ba ka jingbhah kam ka dei ban long tang ia kito ki jaid bynriew ba dang sahdien bad kam dei ban long ia kito kiba la kiew shaphrang.
U la pynshai ruh da kaba ong, ba ha ka jylla ka dei ban long beit 80% ia ki Khasi-Jaintia bad Garo bad ha ka District ruh ka dei ban long 80% tang ia ki trai District bad ki dei pat ban long ki trai district kiba la long ki nongshong shnog kumba 10 snem ei ei. Kane ka dei ban treikam ha man la ka District.
Shuh shuh, u la kren kyrpang ruh ba katkum ka jingai jingmut sha ka expert Committee, ka sorkar lyngba ka State Reservation Policy ka dei ruh ban ai ia ka bhah kito kito kiba duna dkhot met (PWD) la kumno kumno kumno 3% haduh 5% bad ruh na ka bynta kiwei ki ST/SC la kumno kumno kumba 10% bad buh noh ia ka Unreserved kumba 10% khnang ba ka jingthungkam thungjam ne ka jingbhah kam kan long kaba iaid beit iaid ryntih bad ba kan nym mih kano kano banoh shiliang khmat.
