U Bah Heaving Stone Kharpran, MLA ka Voice of the People Party (VPP), ka Mawrynkneng Assembly Constituency, lyngba ka jingialang kaba la long ha ka shnong Mawlynrei u la ioh ban sam paidbah noh ia ki skhim pynroi lyngba ka MLA Schemes 2023-2024 kaba la kot kumba 2.78 klur tyngka.
Ka jingmang na bynta ki kam pynroi lyngba ka MLA scheme ba la sam paidbah mynta ka sngi ki kynthup naduh ka Special Rural Works Programme (SRWP) ka la kot 2.50 klur, ka Development of Traditional Folk Music (DTFM) 2.5 lak, Intensive Sports and Youth Development Programme (ISYDP) 2.5 lak, ka Intensive Arts and Culture Development Program (IACDP) 2.5 lak, ka Chief Ministers Special Rural Development Fund (CMSRDF) 10 lak bad ka Discretionary Grant (DG) 10 lak.
Ha kane ka sngi, la pynlait paidbah ruh ia kawei ka kali kit nongpang kaba la mang lyngba ka CMSRDF na bynta ka jingshakri ia u paidbah ka Konstituensi bad ka jingpynkup burom ia ki rangialehkai boxing kiba la wanrah ia ka nam ka burom ia ka Konstituensi lyngba ki lympung ialehkai boxing.
Na ka liang u Bah Heaving Stone Kharpran, u la pynpaw ia ka jingkmen ban ioh ban sam noh ia ki skhim pynroi lyngba ka MLA skhim na bynta ka jingmyntoi bad ka bit ka biang ki paidbah hapoh ka Konstituensi hi baroh kawei da kaba ai nam ruh ia u Myntri Rangbah barim ka jylla u BB Lyngdoh (Bam Kwai ha Dwar U Blei) ba dei lyngba ka jong u ba la lah ban wanrah ia ka skhim MLA na bynta ka jingbit jingbiang jong ki paidbah nongshong shnong hapoh ka jylla.
