Nongpoh, Risaw 15: Kum shi bynta na ka thong jong ka National Tobacco Control Program (NTCP), ka CHC Bhoirymbong bad ryngkat ka jingiatrei lang bad ka kynhun Young Minds na Ri Bhoi ha ka sngi Nyngkong jong ka taiew la pynlong ia ka prorkam ai jinghikai ba kyrpang ha CHC Bhoirymbong na ka bynta ban pynsgewthuh ia ki khun samla halor ka jingktah jong u duma.
Ha kane ka prorkam la wan shim bynta da ki khynnah skul bad ki nongshong shnong ka thain Bhoirymbong bad la ia don lang ruh ki dkhot nongialam ka kynhun Young Minds na Ri Bhoi bad ruh ki Doctor, ki Nurse bad ki nongtrei ka tnad ka koit ka khiah na CHC Bhoirymbong.
Ka Dr. N.B Mawrie, kaba dei ka senior Dental Surgeon ka la long ka nongai jinghikai ban pynsngewthuh halor ka jingma bad ka jingktah jong u duma. Ka la kren ruh halor shibun ki mat kiba u duma u ktah ia ka koit ka khiah ki paidbah kaba lah ban kylla sha ka jingpang bampong, ka jingbym lah ban ring mynsiem bad kiwei kiwei ki jaid jingpang.
Kum ka Doctor ka la bankhia ia ki paidbah khamtam ki khun samla ba kim dei ban bam ne dih ia u duma, namar shisien ba ki la kyrni la eh ban pynlait bad haba ym lah shuh ban pynlait kalah ban thaw shibun ki jaid jingpang kaba pynlong ia u briew ba un nym long uba koit ba khiah.
Ha kane ka sngi, sa la sam ruh ia ki kot lyngkdop sha ki khynnah skul bad ki paidbah ban pynshai halor ka thong jong ka National Tobacco Control Program, kaba ialeh ban ia khun pyrshah ban pynsngewthuh sha ki paidbah halor ka jingktah jong u duma.
