U Damanbait Lamare, MLA Umroi ha ryngkat u Bah Rangkynsai Kharbuki, MDC, ha ryngkat ka jingdon ki nongialam shnong Umiam, hynnin ka sngi ki la leit ban plie paidbah ia ka jaka leit shabar paidbah (Public Toilet), ia kaba ki la pynioh kyrpang bad shna ha kawei ka jaka, kaba ki nongjngoh pyrthei ki shait sangeh ha kawei ka jaka kaba don ha shnong Umiam, Ri Bhoi.
Ha katei ka sngi, ba la plie paidbah ia kitei ki jaka leit shabar, u Damanbait Lamare, u la ong ba kum u MLA ka Umroi, hadien ba u la iohi ba katei ka jaka, ka dei kaba ju sangeh bad ieng pynjah thait da ki nongshang pyrthei, kam don ia ka jaka leit shabar, kumta u la kren sha ki bor pyniaid Distrik ka Ri Bhoi, ba ki dei ban buh ia ka jingpynmang pisa, na bynta ban shna ia ki jaka leit shabar hapoh katei ka jaka, kaba la pynlong ruh ia ki briew na ophis u Deputy Commissioner ka Ri Bhoi, ba kin pynmang pisa bad kaba la lah ban shna ia artylli ki jaka leit shabar paidbah.
Haba iadei bad katei ka jingplie paidbah ia kitei ki jaka leit shabar, na ka liang ki nongialam shnong ka Dorbar Shnong Umiam, ki la ai ka jingkhublei kaba kyrpang eh ia u Damanbait Lamare, namar ba u la shimkhia ban pynioh ia kitei ki jaka leit shabar hapoh katei ka jaka, kaba dei ruh ka jaka ba bun na ki nongwan jngohkai pyrthei ki shait sangeh ha katei ka jaka.
Ki la pynpaw ruh ba ka jinglah u MLA ban pynioh ia kitei ki jaka leit shabar, ka la long shisha ka jingmyntoi kaba khraw eh ia ka shnong Umiam, namar ka la wanrah ruh ia ka khuid ka suba hapoh ka shnong ka thaw bad khamtam eh ha katei ka jaka, kaba ki nongwan jngohkai pyrthei ki ju sangeh.
