Ka ïingbishar jong ka Bangladesh, ha ka sngi Palei ka la pynmih ïa ka hukum ban kem ïa ka Myntri Rangbahduh barim ka Sheikh Hasina, halor ka jingpynïap pathar ïa ki samla pule kiba ïakhih ha u bnai Naitung bad Nailar hadien ka jingia umsnam kaba jur ha katei ka ri.
U Mohammad Tajul Islam, u nongmudui ba hakhlieh duh jong ka Bangladesh’s International Crimes Tribunal u la ong, Ka ïingbishar ka la hukum ban kem ïa ka Myntri Rangbah duh barim ka Sheikh Hasina, bad ban tian bishar ïa ka ha ka 18 tarik Naiwieng.
Ka liang pynshitom ka la pan ruh ïa ka hukum ban kem pyrshah ïa ki 50 ngut kiwei pat ki riew shimet kiba la kynnoh ba ki donkti ha ki jingpynïap pathar ha ka por ba ki samla pule ki ïakhih pyrshah ïa ka sorkar Awami League ba la ïalam da ka Hasina.
Ka jingsynshar jong ka Hasina kaba 15 snem lynter la ïohi ïa ki jingpynkheiñ ïa ka hok longbriew manbriew kiba la saphriang bha, kynthup ïa ka jingshah set phatok paidbah bad ka jingshah pynïap pathar jong ki nongïaleh pyrshah saiñ hima ha katei ka ri.
Haduh mynta ka Sheikh Hasina kam shym la paw pyrthei shuh naduh ba kala phet na nongbah Dhaka hadien ka jingïakhih jong ki samla pule kiba la dawa ban pynkut noh ïa ka bhah kaba la buh kyrpang 30 percent na ki kam sorkar na ka bynta kiba haïing hasem jong ki riewshlur kiba la ïaleh thma ha ka thma laitluid jong ka Bangladesh ha u snem 1971.
