Nongpoh, Risaw 18: Ki nongshong shnong ka thain Block II, ba hap ha Mawhati Constituency bad kiba dei RUH ki shnong khappud ka Meghalaya bad ka Assam, ki la pynpaw shisha ka jingsngewnguh bad ka jingkhublei kaba kyrpang ia u Bah Charles Marngar kum u MLA bad MDC ka Mawhati Constituency, kaba deui halor ka Nongrim ba u la shim khia ban wan rah ka shongsuk shongsain ki paidbah bad ban nym shah pynthud shuh ki kam pynroi ka sorkar sha kitei ka shnong khappud.
Kum ba pynkynmaw, na ka por sha ka por ki ju mih ki kynrum ki kynram ha kitei ki shnong khappud, ka daw ka long ba ki dei ki shnong ba dang ia kajia pud hapdeng ka Meghalaya bad ka Assam bad la sakhi ruh mynta ba ka jingiapynbeit pud hapdeng ka sorkar Meghalaya bad ka Assam ka dang iaid shakhmat.
Kumba la ioh lum jingtip, ka daw kaba la pynlong ia ki paidbah ban ai khublei kyrpang ia u Bah Charles Marngar, ka dei halor ka jingshisha ba kum u nongmihkhmat u la shim khia ban ia kren bad ban ia kynduh sha ki bor bahalor ka Karbi Anglong Autonomous Council (KAAC), na ka byntai ban don noh ka jingiangewthuh jingmut ban wan rah ia ka shongsuk shongsain bad ruh ban nym pynthud shuh ia ki kam pynroi ha kitei ki shnong khappud la ka long ki kam pynroi ba wan rah da ka sorkar Meghalaya ne na ka jylla sorkar Assam.
Haba kren halor kane ka jingshim khia u Bah Charles Marngar, kum ba la ioh ban ia kren, u la pyntip ba na ka bynta ka shongsuk shongsain bad ban nym shah ktah ki kam pynroi ha kitei ki shnong khappud, da lade hi u la leit ban ia kynduh ia u CEM ka Karbi Anglong Autonomous Council u Dr. Tuliram Ronghang bad kumjuh ruh ia u MAC ka Chinthong Constituency Abijit Kro ban ia kren halor ka kam ban pynneh pynsah ia ka shongsuk ka shongsain bad ruh ban nym pynthud ia ki kam pynroi ha kitei ki shnong khappud.
La ioh ruh ban ia kren bad katto katne ki rangbah bad kynthup ruh ia u Bah B. Sohtun kum u President ka Synjuk ki Rangbah Shnong Border Area jong ka Raid Nongtung, u la pynpaw ia ka jingsngewnguh da kaba ai burom ia u Bah Charles Marngar halor ki kam shlur kiba u la leh ban pynneh ia ka shongsuk shongsain ha kitei ki shnong khappud bad kham niar ban don kum une u nongmihkhmat uba shim khia shisha ia ka eh ka shon ki paidbah ha katei ka Constituency khamtam ha ki shnong khappud ka Block II.
U la ai nuksa ruh ba kawei na kaba u Bah Charles Marngar u la pyni ia ka jingshlur, ka dei ka jingsam ia ka ‘work order’ ha ka shnong Umlaper sha ki 8 tylli ki shnong ban pynbha ia ki skul pule kiba dei ki kam pynroi kiba wan na ka sorkar Meghalaya, ha kaba la don lang ruh u MAC ka Chintong na KAAC u Abhijit Kro ba kane ka pyni shisha ia kata ka jingiatrei lang ban nym don shuh kano kano ka jingpynthud ia ki kam pynroi la ka long na Assam ne Meghalaya bad ruh ban pynneh ia ka shongsuk ka shongsain ki paidbah ha kitei ki shnong khappud.
Haba kren halor ka jinglong jingman, la sakhi ba ha ki por ba la leit noh ki ju mih ki kynrum ki kynram, ki jingpynthud ia ki kam pynroi, hynrei naduh ba wan u Bah Charles Marngar u la shah jied kum u nongmihkhmat, ka la wan kata ka shongsuk shongsain bad kam don shuh kano kano ka jingpynthud ia ki kam pynroi, namar kum u nongmihkhmat u la shim khia shisha ban kynduh ia ki bor ka Karbi Anglong Autonomous Council naduh u CEM ka KAAC bad ruh ki member katei ka KAAC ban ia kren sngewthuh na ka bynta ban pynneh ia ka shongsuk shongsain bad ruh ban nym pynthud ia ki kam pynroi sha kitei ki shnong khappud.
