Nongpoh, Risaw 18: Ka Khasi Students Union (KSU) North Khasi Hills District Unit lyngba ka Employment and Monitoring Cell mynta ak sngi ki la leit ban ia kynduh ia u ADC ka Ri Bhoi bad ki la aiti ruh ia ka dorkhas halor ki 15 tylli ki mat ba ka seng ka pynsngew sha ka bor District na ka bynta ban pynkylla bad ruh ban pynbeit ia ka rukom thungkam thungjam ha ki tnad sorkar bapher bapher khnang ba kan long kaba khuid kaba suba bad kaba yn nym don kano kano ka jingnoh shiliang.
Ha kane ka jingleit kynduh ia u ADC ka Ri Bhoi bad uba dei ruh u Secretary ka DSC, U Raja Brahma, la ialam da u Samla Banjop Maring kum u Chairman katei ka Monitoring Cell bad la synrang lang ruh da ka jingdon lang kiwei kiwei ki nongialam bad ki dkhot ka KSU.
Kitei ki 15 tylli ki mat ba la rah da ka KSU ban phah sha u Deputy Commissioner ka Ri Bhoi lyngba u ADC ki kynthup ka jingthung ïaki Vice Chairman bad dkhot jong ka DSC ki bym don kano kano ka jingïadei bad ka kam saiñ hima sima, ka jingpynbna man u snem ïaka jingdon ki post ba laitkam, ki samla wad kam ki dei ban long ki nongshong shnong jong ka jylla Meghalaya, ban kiar noh ka jingthung ïaki kam kontrak/ adhoc bad casual, ban pynmih ïaka eksam man u snem khlem da pynslem ïaka por, ban pynpaw paidbah ïaki marks ki samla wad kam, kam dei ban don ka jingkylla haki roll no haka por thungkam, ban pynbiang ïaka carbon copy jong ka kot OMR sha ki kyrtong, ban pynlait ruh ïaki jubab jong ki jingkylli, ban pyndep ïaka jingthungkam hapoh 6 bnai hadien ka eksamin, ban pynduh noh ïaka personal interview haka kyrdan B, C bad D, ban ai ïaka kaiphod ba man la u snem da ka DSC, ki jingkylli ki dei ban long kiba rieh ba kin nym lait shabar, ban buh da ki kor computer ban ïakhun ïaki eksam haki por ban wan.
Na ka liang u Samla Banjop Maring, kum u Chairman ka Employment and Monitoring Cell ka KSU North Khasi Hills District, haba kren sha ki lad pathai khubor, u la ong ba ka seng ka la ioh ban ia kren sani bad u ADC bad uba dei ruh u member Secretary ka DSC Ri Bhoi, halor kitei ki mat ba la wan rah da ka KSU ba un kren sha u DC khnang ba ka jingthungkam thungjam kan long kaba iaid beit iaid ryntih ha kino kino ki kam sorkar ba lait post ha Ri Bhoi bad ruh ba kan long kaba khuid kaba suba.
